गेल्या काही दिवसांपासून देशासह गोवा राज्यात पॉप्युलर फ्रंट ऑफ इंडिया (पीएफआय ) संघटनेवर देशविघातक कृत्य करत असल्याचा ठपका ठेवत या संघटनेचे समर्थक, कार्यकर्त्यांची केंद्र सरकारने धरपकड सुरु केली आहे. या पार्श्वभूमीवर राज्यातील काही राजकारणी पीएफआयचे समर्थन करत असल्याची माहिती समोर येत आहे. अशा राजकारण्यांवर राज्य सरकार निश्चित कारवाई करेल असे भाजप नेते दामोदर नाईक यांनी म्हटले आहे.

(Damu Naik told Some politicians are found supporting PFI govt to act against anti-nationals )

राष्ट्रीय तपास संस्था आणि स्थानिक पोलीस पीएफआयच्या नेत्यांची चौकशी करत आहेत. "हळूहळू, कोणते राजकीय नेते पीएफआयला समर्थन देत आहेत हे समोर येत आहे. पीएफआयचे समर्थन करणाऱ्या देशद्रोहींना पाठीशी घालणाऱ्यांवर कारवाई होणार आहे. यात कोणालाही राज्य सरकार तडजोड करणार नाही असे नाईक म्हणाले ते मडगावचे आमदार दिगंबर कामत यांच्या उपस्थितीत आज भाजप नेत्यांनी पत्रकार परिषद घेतली यावेळी बोलत होते.

याबरोबरच नाईक यांनी गोव्यात राहणारे बांगलादेशी आणि रोहिंग्यांची ओळख पटवण्यासाठी आधीच कारवाई सुरू आहे. तसेच राज्य सरकारने अमली पदार्थांच्या विरोधात वेगाने कारवाई केली आहे, त्यामुळे अलीकडच्या काळात अनेक जप्ती आणि अटक झाल्या आहेत. आता सरकारने अंमली पदार्थांच्या विरोधात कारवाई करण्याबाबत तडजोड केलेली नाही आणि जे धर्मांतराच्या कार्यात सामील होतील त्यांना ही तडजोड करणार नाही असे ही ते म्हणाले.

यावेळी कोणाचेही नाव न घेता नाईक म्हणाले की, "स्वयंघोषित विरोधी पक्षनेता" सरकारच्या विरोधात विधाने करत आहे, आणि आपली निराशा बाहेर काढत आहे. यातून ते चुकीच्या राजकीय कथा मांडण्याचा प्रयत्न करत आहेत. मात्र यामध्ये ते कधीच यशस्वी होऊ शकणार नाहीत. असा टोला ही त्यांनी राज्यातील राजकिय नेत्याला लगावला.