Madgaon Mayor Election : भाजपचे दामोदर शिरोडकर मडगावचे नगराध्यक्ष होणार असल्याचं आता जवळपास निश्चित झालं आहे. मडगावचे नगराध्यक्ष बनण्याचा दामोदर शिरोडकर यांचा मार्ग खुला झाला असून आज त्यांचा एकमेव उमेदवारी अर्ज आल्याने ते बिनविरोध निवडून आल्यात जमा झाले आहेत. या संबंधीची औपचारिक घोषणा उद्या बोलाविलेल्या बैठकीत केली जाणार आहे.

नगराध्यक्ष निवडण्यासाठी उद्या होणारी निवडणूक हात दाखवून केली जाणार असल्याने विरोधी गटाने या निवडणुकीवर बहिष्कार घातल्याने त्यांनी आपला उमेदवार उभा केला नाही. शिरोडकर यांनी आज एकूण तीन उमेदवारी अर्ज भरले. त्यांना दामोदर वारंग, कामिलो बार्रेटो आणि रोनिता आजगावकर यांनी अनुमोदन दिले.

यापूर्वी झालेल्या नगराध्यक्ष पदाच्या निवडीत दामोदर शिरोडकर याना गोवा फॉरवर्डचे उमेदवार घनःश्याम शिरोडकर यांच्या कडून 15 विरुध्द 10 मतांनी पराभव स्वीकारावा लागला होता. त्यावेळी भाजपच्याच 5 नगरसेवकांनी विरोधी मतदान केले होते. त्यानंतर पुन्हा अशी बंडाळी होऊ नये म्हणून भाजपच्या 17 ही नगरसेवकांना काल रात्री बेतालभाटी येथील हॉटेलमध्ये ठेवण्यात आले होते. आज त्या सर्वांना परस्पर पालिकेने आणले गेले.