म्हापसा: आताफोंड-कालिझर बंधाऱ्याला (Ataphond-Kalizhar dam) तीन किलोमीटरपर्यंत भगदाड पडल्याने नदीचे पाणी ओसंडून शेतांमध्ये वाहात आहे. परिणामी भातशेती पाण्याखाली गेल्याने मयडे गावातील शेतकऱ्यांना अडचणींचा सामना करावा लागत आहे. सरकारने या बंधाऱ्याची ताबडतोड दुरुस्ती करण्याची मागणी स्थानिक शेतकऱ्यांनी केली आहे.

आताफोंड-कालिझर बांध हा मयडे गावातील प्रमुख बांधांपैकी एक आहे. तो नदीच्या प्रवाहावर नियंत्रण ठेवण्यासाठी बांधलेला असून, त्यामुळे येथील शेतीचे संरक्षण होते. माती संवर्धन विभागाच्या अधिकाऱ्यांनी सर्वेक्षण केले आहे. अंदाजपत्रक तयार करून ते शासनाला सादर करणार आहेत. सरकारने या समस्येकडे लक्ष द्यावे, अशी मागणी टेनंट असोसिएशनचे अध्यक्ष फिलीप डिसोझा यांनी केली आहे.

वारंवार भगदाडे पडण्याचे प्रकार

सध्या हा बांध कमकुवत झाला आहे. परिणामी, विविध ठिकाणी भगदाड पडल्याने नदीचे पाणी शेतात घुसत आहे. त्याचा फटका शेतकऱ्यांना बसत आहे. आताफोंड-कालिझर टेनंट संघटनेने तीन किलोमीटरपर्यंत हा पट्टा स्वच्छ करण्याचे काम हाती घेतले आणि बंधाऱ्यावरील आठ ठिकाणी दुरुस्तीही केली. तरीही पुन्हा भगदाड पडण्याचे प्रकार सुरूच आहेत. त्यामुळे येथील शेतकऱ्यांना सध्या शेती करणे कठीण झाले आहे.