शहर स्वच्छ व सुंदर दिसावे यासाठी नागरिकांनी कचरा रस्त्याकडेला न टाकता घरोघरी कचरा गोळा करण्यासाठी येणाऱ्या कामगारांकडे द्यावा. प्रत्येकाने शहर स्वच्छ ठेवण्यासाठी सहकार्य करावे. तसेच मुरगाव पालिकेचे विविध कर, भाडेपट्टी इत्यादींची थकबाकी त्वरित फेडावी जेणेकरून मुरगाव पालिकेच्या कामगारांना वेतन वितरित करता येईल, असे आवाहन वास्कोचे आमदार दाजी साळकर यांनी केले.

एका खासगी कंपनीतर्फे मुरगाव पालिकेला 110 कचरा पेट्या देण्यात आल्या. या कचरा पेट्या मुरगाव पालिकेच्या स्वाधीन करण्याच्या सोहळ्याप्रसंगी आमदार साळकर बोलत होते. याप्रसंगी मुरगावचे नगराध्यक्ष लिओ रॉड्रिग्ज, उपनगराध्यक्ष अमेय चोपडेकर, नगरसेवक गिरीश बोरकर, दामोदर कासकर, प्रजल मयेकर, विनोद किनळेकर, दीपक नाईक, शमी साळकर व कंपनीचे अधिकारी उपस्थित होते.

मुरगाव पालिकेच्या तिजोरीत महसूल जमा होत नसल्याने कामगारांना वेळेवर वेतन देता येत नाही. जे थकबाकी भरण्यास टाळाटाळ करीत आहेत. त्यांच्याविरोधात वेळप्रसंगी कडक कारवाईही करण्यात येईल, असे साळकर यांनी सांगितले.