Dabolim Well Issue: माटवे-दाबोळी येथील विहिरींतील पाण्याने पेट घेतल्याचा धक्कादायक प्रकार समोर आला होता. त्यानंतर विहिरींमध्ये ज्वलनशील पेट्रोलियम पदार्थ असल्याचे आढळले.

याबाबत पंचायत सदस्य नीलम नाईक यांनी काल (शुक्रवारी) अज्ञात व्यक्तींविरुद्ध पेट्रोलियम पदार्थांनी विहीर दूषित करून जीवित व मालमत्ता धोक्यात आणल्याप्रकरणी तक्रार दाखल केली आहे.

ज्या दिवशी हा प्रकार घडला त्यादिवशी त्वरित पोलीस, जलसंपदा विभागाचे अधिकारी आणि अग्निशमन जवान दाखल होत घटनेची पाहणी केली. मात्र त्यानंतर चार दिवस उलटले तरी याबाबत पुढे काहीच झाले नाही. विहिरींमध्ये पेट्रोलियम घटक येण्याचा स्त्रोत शोधून काढला पाहिजे, असे नाईक यांनी सांगितले.

तसेच त्या पुढे म्हणाल्या की, कंपनीकडून सुरू असलेल्या उत्खननाच्या कामावरही लक्ष ठेवावे आणि दोषींवर लवकरात लवकर गुन्हा दाखल करावा.

या प्रकरणात, पेट्रोलियम पदार्थांची चोरी झाली आहे की, खरेच पाईपलाईनची गळती झाली, याचा सखोल तपास करावा लागेल.

दाबोळीचे पाणी झुआरीनगर नाल्यात मिसळते आणि जर जास्त प्रमाणात गळती झाली तर नाफ्था दुर्घटनेसारखी आपत्ती ओढवू शकते. सध्या भागातील लोक स्वयंपाकासाठीही बाहेरून पाणी आणत आहेत. त्यामुळे अधिकाऱ्यांनी या प्रकरणात अधिक सक्रिय व्हायला हवे, अशी मागणी नाईक यांनी केली.