पणजी: पुढील पाच दिवस राज्यात पावसाची (Goa Rain Updates) शक्यता नसली तरी शनिवारी काही भागांत तुरळक सरींनी हजेरी लावली. त्यामुळे 24 तासांत 4.8 मि.मी. पावसाची नोंद झाली. आंध्र प्रदेशात वादळाने हाहाकार उडवला असला तरी त्याचा गोवा राज्यावर परिणाम होणार नाही. पण तुरळक सरी बरसतील, असे गोवा हवामान वेधशाळेने (IMD Goa) म्हटले आहे. शनिवारी म्हापसा, पेडणे, वाळपई, मडगाव आणि सांगे परिसरात तुरळक सरींनी हजेरी लावली. सध्या तापमानात घट होत आहे. मात्र पुढील 3-4 तासांत उत्तर गोवा आणि दक्षिण गोवा जिल्ह्यात काही ठिकाणी हलका ते मध्यम पाऊस पडण्याची शक्यता आहे.

आंध्र, ओडिशाच्या किनारी मुसळधार

‘जवाद’ या चक्रीवादळाच्या प्रभावामुळे आंध्र आणि ओडिशाच्या किनारपट्टीवर जोरदार पावसाला सुरूवात झाली असून हे वादळ आज पुरीच्या किनाऱ्यावर धडकण्यापूर्वी त्याचे रूपांतर हे तीव्र कमी दाबाच्या क्षेत्रामध्ये होईल, असा अंदाज हवामान खात्याकडून वर्तविण्यात आला आहे. येत्या चोवीस तासामध्ये या वादळाच्या प्रभावामुळे ओडिशातील अनेक जिल्ह्यांमध्ये तीव्र अतिवृष्टी होऊ शकते.