पणजी: सायबर भामट्यांनी गेल्‍या तीन वर्षांत २९६ गोमंतकीयांना सुमारे ७४.१३ कोटी रुपयांचा गंडा घातल्‍याची माहिती मुख्‍यमंत्री डॉ. प्रमोद सावंत यांनी विधानसभेतील लेखी प्रश्‍‍नाच्‍या उत्तरातून दिली आहे. या भामट्यांना बळी पडत असलेल्‍या ज्‍येष्‍ठ नागरिकांच्‍या संख्‍येत वाढ झाल्‍याचेही त्‍यांनी म्‍हटले आहे.

आमदार आलेक्‍स रेजिनाल्‍ड यांनी याबाबतचा प्रश्‍‍न विचारला होता. ऑनलाइन पद्धतीने लोकांची आर्थिक फसवणूक होण्‍याच्‍या प्रकरणांत दरवर्षी वाढ होत चालली आहे. २०२३ ते २०२५ या तीन वर्षांच्‍या काळात राज्‍यात अशी किती प्रकरणे घडली? त्‍यात नागरिकांचे किती नुकसान झाले?

यात ज्‍येष्‍ठ नागरिकांचे प्रमाण किती आहे? असे प्रकार का वाढत आहेत? आणि ते रोखण्‍यासाठी सरकारने कोणत्‍या उपाययोजना केल्‍या आहेत? असे प्रश्‍‍न आमदार रेजिनाल्‍ड यांनी विचारले होते.

त्‍यावर २०२३ ते २०२५ या तीन वर्षांच्‍या काळात सायबर भामट्यांनी २९६ जणांची सुमारे ७४.१३ कोटींची फसवणूक केल्‍याचे मुख्‍यमंत्र्यांनी म्‍हटले आहे. २०२३ मध्‍ये ६.१७ टक्‍के ज्‍येष्‍ठ नागरिकांची अशा पद्धतीने फसवणूक झाली होती.

२०२४ मध्‍ये त्‍यात वाढ झाली. यावर्षी १४.११ टक्‍के ज्‍येष्‍ठ नागरिकांची फसवणूक झाली. तर गतवर्षी १२.२१ टक्‍के ज्‍येष्‍ठ नागरिकांना सायबर भामट्यांनी चुना लावल्‍याचे त्‍यांनी नमूद केले आहे.

जागृतीचा अभाव, विकसित होत असलेली गुन्हेगारी तंत्रे, वैयक्तिक माहितीचा गैरवापर, सहज आणि लवकर पैसे कमावण्‍याचा मोह आदींसारख्‍या कारणांमुळे सायबर गुन्ह्यांमध्‍ये वाढ होत चालली आहे. असे प्रकार रोखण्‍यासाठी पोलिसांनी विविध प्रकारच्‍या उपाययोजना केल्‍या आहेत.

याबाबत जनतेत सातत्‍याने जागृती केली जात आहे. पोलिस खात्‍यातील अधिकारी, कर्मचाऱ्यांना सायबर संबंधित गुन्हे हाताळण्यासाठी प्रशिक्षित करण्यात आले आहे आणि कौशल्य वाढवण्यासाठी त्‍यांना नियमित प्रशिक्षण दिले जात आहे.

सायबर गुन्हेगारीच्या तपासात मदत करण्यासाठी प्रगत फॉरेन्सिक साधने आणि सॉफ्टवेअर उपलब्ध करण्‍यात आले आहे. तसेच बँक अधिकाऱ्यांसोबत बैठका घेतल्या जात असून, ऑनलाइन फसवणूक रोखण्यासाठी घ्यावयाच्या खबरदारीच्या उपायांवर त्‍यांच्‍याशी सविस्तर चर्चा केली जात असल्‍याचेही मुख्‍यमंत्र्यांनी स्‍पष्‍ट केले आहे.