पणजी : पैंगीण येथील अनिल टेंसेला ‘डिजिटल अरेस्ट’च्या नावाखाली तब्बल ४२ लाख ६० हजार ९४ रुपयांचा गंडा घालणाऱ्या तेजस नरहरे (वय ३६, रा. मालेगाव रोड, नांदेड) याला अटक केली आहे.

याप्रकरणी पैंगीण येथील रहिवासी अनिल टेंसे यांनी सायबर पोलिस ठाण्यात तक्रार दाखल केली होती. तक्रारीनुसार पोलिसांनी २० मार्च रोजी भारतीय न्यायसंहितेच्या कलम ३१८(४), ३१९(२), ३०८ आणि माहिती तंत्रज्ञान कायद्याच्या कलम ६६-डी अंतर्गत गुन्हा नोंदवला होता.

तक्रारीनुसार, ३० जानेवारी ते २१ फेब्रुवारी या कालावधीत संशयिताने विविध व्हॉट्स ॲप क्रमांकांवरून तक्रारदाराशी संपर्क साधला. संशयिताने आपण केंद्र सरकारचा दूरसंचार विभाग आणि मुंबई क्राईम ब्रँचचे वरिष्ठ अधिकारी असल्याचे भासवले होते. तक्रारदाराचे आधार कार्ड जेट एअरवेजचे नरेश गोयल यांच्याशी संबंधित बेकायदेशीर व्यवहार आणि गुन्हेगारी कृत्यांमध्ये वापरल्याची भीती भामट्याने दाखवली.

नंतर तक्रारदाराला ‘डिजिटल अरेस्ट’खाली ठेवून कारवाई टाळण्यासाठी आणि प्रकरण मिटवण्यासाठी एकूण ४२,६०,०९४.४० रुपये वेगवेगळ्या बँक खात्यांत भरण्यास भाग पाडले होते. संशयिताला न्यायालयात हजर करून पुढील तपासासाठी पोलिस कोठडी मागण्यात आली आहे. या आंतरराज्य सायबर गुन्हेगारी टोळीत आणखी कितीजणांचा सहभाग आहे आणि या प्रकरणातील रक्कम कोठे वर्ग केली याचा अधिक तपास सायबर पोलिस करत आहेत.