Cutbona Mobor
कुटबण जेटीवर झालेला कॉलराचा फैलाव पिण्‍याच्‍या पाण्‍यामुळे झाला आहे का, हे शोधून काढण्‍यासाठी या जेटीवर ज्‍या बोअरवेल आहेत, त्‍यां‍तील पाण्‍याची तपासणी करण्‍याचा निर्णय आज झालेल्‍या बैठकीत घेण्‍यात आला. प्रत्‍येक ट्रॉलरवर दोन शौचालये उभारण्‍य‍ाची सूचना मच्‍छीमार खात्‍याच्‍या संचालक यशस्‍विनी पी. यांनी यावेळी ट्रॉलरमालकांना केली.
दक्षिण गोव्‍याचे उपजिल्‍हाधिकारी गणेश बर्वे यांनी आज कुटबण जेटीवर मच्‍छीमार खात्‍याचे अधिकारी आणि बोटमालकांची एक बैठक घेतली. तीत वेगवेगळ्‍या विषयांवर चर्चा करण्‍यात आली. जेटीवर स्‍वच्‍छता राखण्‍यासाठी तेथे भंगार अवस्‍थेत असलेल्‍या बोटी हटविण्‍यात याव्‍यात, अशी सूचना बोटमालकांना करण्‍यात आली, अशी माहिती मच्‍छीमार खात्‍याचे सचिव ई. वलावन यांनी दिली.
कुटबण आणि मोबोर या दोन्‍ही मच्‍छीमारी जेटींवरील कॉलराबाधित रुग्‍णांची संख्‍या १८७ वर पोहोचली आहे. कालपर्यंत ती १८३ होती. आज आणखी ४ रुग्‍ण सापडले, अशी माहिती साथीच्‍या रोगनिवारक विभागाचे प्रमुख डॉ. उत्‍कर्ष बेतोडकर यांनी दिली. २ रुग्‍णांना ट्रॉलरवर असताना जुलाब व उलट्या सुरू झाल्‍या होत्‍या. आज किनाऱ्यावर पोहोचल्‍यावर लगेच त्‍यांना इस्‍पितळात हलविण्‍यात आले. सध्‍या ६ रुग्‍णांवर गोमेकॉत, दोघांवर दक्षिण गोवा जिल्‍हा इस्‍पितळात तर २० रुग्‍णांवर जेटीवरच उपचार सुरू आहेत, असेही त्‍यांनी सांगितले.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.