केपे: पेयजल विभागाच्या (डीडीडब्ल्यू) अधिकाऱ्यांनी आज कुडचडे रेल्वे स्टेशनजवळील एका खासगी आस्थापनाद्वारे व्यवस्थापित केलेल्या सार्वजनिक शौचालयाची नळ जोडणी तोडून टाकली.

डीडीडब्ल्यू (महसूल) चे सहाय्यक अभियंता हरेश काकोडकर यांनी माहिती दिली की, सदर शौचालयाचे २.७५ लाख रुपयांचे पाणी वापराचे बिल थकले असल्याने सदर कारवाई केली आहे.

प्राप्त माहितीनुसार सदर शौचालयाची नळ जोडणी कुडचडे काकोडा पालिकेच्या(सीसीएमसी) नावाने आहे. सुरुवातीला डीडीडब्ल्यू अधिकाऱ्यांनी पाणी वापराच्या थकबाकी रकमेसाठी सीसीएमसीला नोटीस पाठवली होती.

सीसीएमसी अधिकाऱ्यांनी सार्वजनिक शौचालय व्यवस्थापनाला पाणी वापराच्या थकबाकी रकमेची भरपाई करण्यास सूचित केले होते. पण वारंवार सूचना देऊनही सदर शौचालय व्यवस्थापनाने सकारात्मक प्रतिसाद न दिल्याने, १५ दिवसांच्या आत पैसे न भरल्यास डीडीडब्ल्यू अधिकाऱ्यांना सदर सार्वजनिक शौचालयाची नळ जोडणी तोडण्यात येईल असे कळविण्यात आले होते.

स्वच्छतागृह मात्र सुरू

आतापर्यंत ‘डीडीडब्ल्यू’च्या अधिकाऱ्यांनी सुमारे ४०० नळ जोडण्या तोडल्या आहेत. दरमहा सर्व ग्राहकांना पाणी बिल पाठवले जाते. जर कोणीही दोन महिन्यांचे बिल भरले नाही तर त्याला नोटीस पाठवली जाते.

जर त्याने नोटिसांना उत्तर दिले तर पत्रव्यवहार सुरूच राहतो व जर पक्षाने नोटिसीला उत्तर दिले नाही तर त्याचे पाणी कनेक्शन तोडले जाते. विशेष म्हणजे, पाणी तोडल्यानंतर सार्वजनिक स्वच्छतागृह बंद करण्याऐवजी, ते जनतेसाठी खुले ठेवण्यात आले आहे.