राज्यावर कचरा कोंडीचे संकट घोंगावू लागले आहे. उच्च न्यायालयाच्या आदेशानुसार सोनसडो येथील कचरा काकोडा येथील कचरा प्रक्रिया प्रकल्पात नेण्यास कुडचडे-काकोडा पालिकेने विरोध दर्शविला आहे.

न्यायालयाच्या पूर्वीच्या आदेशानुसार सोनसडोतील कचरा साळगाव येथील प्रकल्पात नेण्यात येत होता. आता साळगाव येथील प्रकल्पात फोंडा व मुरगावातील कचरा न स्वीकारण्याचा निर्णय घेतला गेला आहे. त्यामुळे कचरा प्रश्नाचा फुटबॉल होण्याची शक्यता आहे.

आमच्याकडे दुसऱ्याचा कचरा नको, अशी भूमिका प्रत्येकजण घेऊ लागला आहे. यामुळे गोवा कचरा व्यवस्थापन महामंडळाचा निर्णय घेण्यात कस लागणार आहे.

या प्रकरणी उच्च न्यायालयातही हस्तक्षेप याचिका कुडचडे पालिका दाखल करणार असल्याने हा विषय चिघळण्याची शक्यता आहे.

दक्षिणेतील कचरा साळगावात कशाला?

कळंगुटचे आमदार मायकल लोबो म्हणाले, साळगाव कचरा प्रक्रिया प्रकल्प हा फक्त उत्तरेतील किनारी भागांतील पंचायतींसाठी आहे. काही दिवसांत पर्यटन हंगामास सुरवात होईल.

त्यामुळे किनारी भागांतील हॉटेल उद्योग सुरू होऊन कचरा निर्मिती वाढेल. त्यामुळे प्रकल्पात जास्त कचरा येईल. त्यात दक्षिण गोव्यातील अतिरिक्त कचऱ्यामुळे साळगाव प्रकल्पावर ताण पडेल.

मुळात दक्षिणेतील कचरा साळगावमध्ये कशाला? दक्षिणेतील कचरा संकलन योग्य पद्धतीने करा.