मडगाव: युवतीवर बलात्कार केल्‍याप्रकरणी कुंकळ्ळी पोलिसांनी अटक केलेला मेल्सन कुतिन्हो याला दक्षिण गोवा प्रधान जिल्हा सत्र न्यायालयाने सशर्त जामीन मंजूर केला. ५० हजार रुपये व एक हमीदार तसेच न्यालयालाच्या पूर्व परवानगीशिवाय राज्याबाहेर न जाणे आदी अटी जामीन मंजूर करताना घातल्या आहेत. न्यायाधीश शेरीन पॉल यांच्या न्यायालयाने हा निवडा दिला.

सोशल मीडीयावर मैत्री करून एका युवतीला प्रेमपाशात ओढवून नंतर तिच्यावर अत्‍याचार केल्या प्रकरणात मेल्सनला पोलिसांनी अटक केली होती. मागाहून त्याची रवानगी १४ दिवसांच्या न्यायालयीन कोठडीत करण्यात आली होती.

आजारी असल्‍याचे सांगून तसेच तपासणीसचा बहाणा करून मेल्सनने त्या युवतीकडून रोकड व सुवर्णलंकारही घेतले होते. त्‍याची किंमत तब्बल ९० लाखांपेक्षा जास्‍त होती. आपण फसविले गेल्याचे लक्षात आल्यानंतर पीडितेने यासंबंधी पोलिसात तक्रार नोंदविली होती.

संशयितावर पोलिसांनी भारतीय न्यायदंड संहितेच्या ६४ (१) , ३५१ (४ ), ३१८ (४) कलमाखाली गुन्हा नोंद​ केला होता. पीडित युवतीशी त्याने सोशल मीडियावरून फ़्रेंडशिप रिक्वेस्ट पाठवून नंतर मैत्री केली होती.

विवाहाचे आमिष दाखवून तिच्याशी लैंगिक संबंध ठेवले. नंतर आपल्या घरी बोलावून तो पीडितेवर बलात्कार करत असे. चालू वर्षाच्या ९ एप्रिल ते १८ ऑगस्ट या काळात त्‍याने तिच्‍यावर वारंवार अत्‍याचार केला होता. पण नंतर तो आपल्‍याला फसवत असल्‍याचे त्‍या युवतीच्‍या लक्षात आले.