भाजपचे पाच नगरसेवक दिल्लीत एका दौऱ्यावर जायचे आहेत, अशी सबब पुढे करून रद्द करण्यात आलेली कुंकळ्ळी नगराध्यक्ष अविश्वास ठरावावरील बैठक सत्ताधारी गटातील नगरसेवकांनी आवाज उठवल्यावर नगरपालिका प्रशासन संचालक गुरुदास पिळर्णकर यांनी अवघ्या चार तासांत मागे घेतली.परिणामी उद्या मंगळवारी पूर्व नियोजनानुसार बैठक होणार हे निश्‍चित झाले आहे.

विरोधी पक्षनेते युरी आलेमाव यांच्या गटातील सात नगरसेवकांनी एका अपक्ष नगरसेवकाच्या सहयोगाने आपल्याच गटाचे नगराध्यक्ष डॉ. लक्ष्मण नाईक यांच्या विरोधात अविश्वास ठराव आणला आहे. चौदा पैकी आठ नगरसेवकांनी ठरावाच्या समर्थनात सह्या केल्या आहेत. उद्या त्यावर चर्चा करण्यासाठी बैठक आयोजित केली होती.

विरोधी भाजप गटाचे नगरसेवक विदेश देसाई, पोलिटा कार्नेरो, विशाल शाबु देसाई, रूपा गावकर आणि राहुल देसाई हे दिल्ली दौऱ्यावर जात असल्याचे कारण पुढे करून सोमवारी सकाळी पिळर्णकर यांनी ही बैठक रद्द केल्याची नोटीस जारी केली. मात्र, सत्ताधारी गटातील नगरसेवकांनी याला तीव्र आक्षेप घेतल्यावर अवघ्या चार तासांत पिळर्णकर यांनी आपला निर्णय बदलून ही बैठक पूर्वनिश्‍चितीनुसार होईल, असे सुचविणारी नवीन नोटीस जारी केली.

सरांची खुर्ची जाणार !

लक्ष्मण नाईक यांना वाचविण्यासाठी विरोधकांनी कट रचल्याचा आरोप काही नगरसेवकांनी केला आहे. मात्र, उद्याच्या अविश्वास ठरावावरील चर्चेत लक्ष्मण सरांची खुर्ची जाणार, अशी चर्चा पालिका वर्तुळात रंगली आहे.

वर्ष होऊनही पद न सोडल्याने ‘अविश्‍वास’

कुंकळ्ळी पालिकेवर युरी आलेमाव यांचे समर्थन लाभलेले मंडळ असून सत्ताधारी गटानेच नगराध्यक्ष नाईक यांच्या विरोधात अविश्वास ठराव आणला असून दिलेला एका वर्षाचा कालावधी उलटूनही त्यांनी पद सोडले नाही, म्हणून त्यांच्या विरोधात हा ठराव आणला आहे.