डिचोली, ढोल-ताशे आणि समेळच्या ठेक्यावर आणि ‘धिन्ना था थय्या धिन्ना थय्या’च्या तालावर डिचोलीतील वैशिष्ट्यपूर्ण ‘वीरभद्र’ उत्सव रविवार, ७ रोजी रात्री परंपरेप्रमाणे मोठ्या उत्साहात साजरा करण्यात आला. विशिष्ट पद्धतीने नाचणाऱ्या वीरभद्राचा थयथयाट पाहण्यासाठी आतीलपेठ भागात नागरिकांनी प्रचंड गर्दी केली होती.
डिचोलीतील आतीलपेठ येथील श्री शांतादुर्गा मठ मंदिर देवस्थानच्या शिमगोत्सवातील वैशिष्ट्य आणि प्रमुख आकर्षण असलेल्या ‘वीरभद्र’ उत्सवाला सांस्कृतिक परंपरा आणि मोठा वारसा आहे. दरवर्षी धुळवडीच्या पूर्वरात्री ‘वीरभद्र’ साजरा करण्यात येतो. यंदा हा उत्सव भायलीपेठ महाजन आणि बाजारकर दहाजण मंडळातर्फे साजरा करण्यात आला.
रात्री ९.३० वाजण्याच्या सुमारास वीरभद्र साकारलेल्या व्यक्तीला (विनायक फोगेरी) विशिष्ट आणि पारंपरिक पद्धतीने सजविण्यात आले. कायरो हॉस्पिटलसमोरील जंक्शनवर गाऱ्हाणे अर्थातच नमन झाल्यानंतर वीरभद्र उत्सवाला प्रारंभ झाला.
ढोल-ताशांच्या ठेक्यावर आणि ‘धिन्ना था थय्या धिन्ना थय्या’च्या तालावर हातात तलवारी घेतलेल्या वीरभद्राचा थयथयाट सुरू झाला. वाटेत गवताला लावलेली आग ओलांडून मार्गक्रमण करीत वीरभद्राचे मठ मंदिरात आगमन झाले.
देवीच्या सज्जाखाली येताच अवसररूपी वीरभद्राला उचलून रंगमंचावर नेण्यात आले. श्री देवी शांतादुर्गेचे तीर्थ तोंडात घालण्यात आले वीरभद्राच्या अंगात संचारलेला अवसर निवळल्यानंतर या उत्सवाची सांगता झाली.
‘वीरभद्रा’नंतर नाट्यप्रयोग
मठ मंदिरात आगमन होताना ‘वीरभद्रा’ची नजर देवीच्या नजरेशी एकरूप होणार नाही, त्याची काळजी घेण्यात येते.
तसेच सज्जाखाली येताच अवसर संचारून वीरभद्र आक्रमक होताच त्याला नियंत्रणात आणण्यात येते. वीरभद्र झाल्यानंतर नाट्यप्रयोग सादर करण्यात आला.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.