डिचोली: डिचोली तालुक्यातील साळ गावा पाठोपाठ कृषीप्रधान 'धुमासे' या छोट्याशा गावातील शेतकरीही आता हळद लागवडीकडे वळले आहेत. माजी आमदार नरेश सावळ यांच्या पुढाकारातून आणि कृषी खात्याच्या सहकार्याने धुमासेतील पाच कुटुंबातील शेतकऱ्यांनी मिळून दहा हजार चौरस मीटर क्षेत्रफळ असलेल्या शेतजमिनीत (अडीज एकर) हळद लागवड केली आहे. (Cultivation of turmeric by Bicholim farmers)

धुमासेतील ज्येष्ठ शेतकऱ्यांसह युवकांनीही मोठ्या उत्साहात हळद लागवड केली आहे. नरेश सावळ हेसुद्धा शेतकऱ्यांसमवेत हळद लागवडीत उतरले आहेतl. भिसो नाईक, न्हानू नाईक, नारायण नाईक, आनंद नाईक, रवींद्र नाईक, उमानाथ नाईक, अर्जुन नाईक आदी पाच कुटुंबातील शेतकऱ्यांनी सामूहीकरित्या हळद लागवड केली आहे.

औषधी गुणधर्म असलेल्या आणि दैनंदिन आहारातील एक मुख्य घटक असलेल्या हळदीला आर्थिक, धार्मिक, औषधी आणि सामाजिक क्षेत्रात महत्वाचे स्थान आहे. आयुर्वेदात महत्वाचे स्थान असलेल्या हळदीला बाजारपेठेत प्रचंड मागणी आहे. हळद एक नगदी पिक म्हणून पाहिले जात आहेच. यामुळेच आणि नरेश सावळ यांनी सहकार्य केल्यानेच धुमासेतील शेतकऱ्यांनी हळद लागवड करण्याकडे लक्ष केंद्रित केले आहेत. हळद पिक घेण्यासाठी मोठी मेहनत घ्यावी लागत नाही. आणि रानटी जनावरांपासूनही या पिकाला उपद्रव होण्याचा धोका नसतो. साळ पाठोपाठ धुमासेतील शेतकरी हळद लागवडीकडे उतरल्याने या दोन्ही गावांची 'हळद' क्रांतीच्या दिशेने वाटचाल सुरु असल्याचे स्पष्ट होत आहे.