Goa Crime News: सांत आंद्रेचे आमदार वीरेश बोरकर यांचा कनिष्ठ बंधू साईश बोरकर आणि इतर दोघांनी महिलेचा छळ केल्याची तक्रार आगशी पोलिसांत नोंद करण्यात आली आहे. त्यानुसार पोलिसांनी तपास सुरू केला आहे.

ही घटना 12 नोव्हेंबर रोजी घडली. साईश बोरकर (वय 28 वर्षे) आणि त्याचे दोन सहकारी साईश नाईक आणि एका अज्ञाताने आजोशी येथील महिलेचा पाठलाग करत ते थेट तिच्या घरापर्यंत गेले. त्यानंतर मुख्य दरवाजा तोडून घरात घुसून तिला धमकावून छळ केला. तसेच महिलेसोबत असलेल्या व्यक्तीलाही मारहाण केली. पीडित महिलेने पोलिसांत तक्रार नोंदवली होती.

घरात घुसून मारहाण

संबंधित महिला ‘आरजी’ पक्षाची कार्यकर्ती असून ती मित्रासोबत पिलार येथे आली होती. साईश बोरकर आणि पीडित महिलेची पूर्वी मैत्री असल्याने त्यांच्या जोरदार भांडण झाले. त्यानंतर बोरकर आणि त्याच्या सहकाऱ्यांनी महिलेचा पाठलाग करून ते तिच्या घरापर्यंत गेले. तेथे घरात घुसून महिलेच्या मित्राला मारहाण केली.