Goa Government: पणजीतील व्यावसायिक कर खात्यात सफाई कामगार म्हणून गेली 26 वर्षे रोजंदारीवर काम केलेल्या वृद्धेच्या मूलभूत अधिकारांचे उल्लंघन केल्याप्रकरणी तिला पाच लाखांची भरपाई दोन महिन्यांत द्यावी.

ही भरपाई मुदतीनंतर दिल्यास ती 7 टक्के व्याजाने द्यावी लागेल, असे निर्देश मुंबई उच्च न्यायालयाच्या गोवा खंडपीठाने दिले आहेत.

दवर्ली-नावेली येथील ज्योकिना गोम्स ई कुलासो (64) यांनी खंडपीठात याचिका सादर केली होती. तिला 63व्या वर्षी खात्याने रोजंदारी कामावरून कमी केले होते.

सेवा नियमित करून तिला निवृत्तिवेतन तसेच भरपाई देण्याची विनंती याचिकेत करण्‍यात आली होती.

• ज्योकिना कुलासो हिने 2022 मध्ये नव्याने याचिका सादर केली. त्यावरील सुनावणीवेळी, याचिकादार महिला खात्यामध्ये काम करत असताना तिला वेतन दिले जात होते.

• खात्याने किमान वेतन न देता कायद्याचे उल्लंघन केले आहे. . त्यामुळे तिला सेवेत नियमित करता येत नसल्यास देण्यात आलेले वेतन कायद्यानुसार नसल्याने सरकारने भरपाई द्यायला हवी.

• तिला आलेल्या कमी वेतनाची रक्कम पाहता तसेच तिने केलेली सेवा पाहता किमान 5 लाख रुपये तरी सरकारने भरपाई म्हणून तिला देणे योग्य ठरेल., असे न्यायालयाने म्‍हटले आहे.