आगोंद: वन्यजीव व मानव जातीचे संघर्षपूर्ण जीवनातील अनेक किस्से अधूनमधून ऐकायला मिळत आहेत. अशीच एक घटना सोमवार, ३० रोजी पहाटे खोतिगाव येथील पणसुलेमळ या ठिकाणी घडली.

भक्ष्याच्या शोधात मध्यरात्री विहिरीत पडलेल्या बिबट्याला सोमवारी पहाटे रेंज वन अधिकारी आनंद वेळीप आणि त्यांच्या संपूर्ण टीमच्या मार्गदर्शनाखाली वाचवण्यात आले. वन विभागाचे हंगामी कर्मचारी असलेले राजेश वेळीप यांच्या मालकीच्या पणसुलेमळ येथील खोल विहिरीतून बिबट्याला सुखरूप बाहेर काढण्यात आले.

वनअधिकारी आनंद वेळीप यांच्या नेतृत्वाखाली वन विभागाने तत्परतेने आणि यशस्वीपणे दोऱ्यांचा वापर करून थकलेल्या बिबट्याला अथक प्रयत्नांनंतर सुखरूप विहिरीबाहेर काढले व मानव वन्यजीव संघर्ष तपासणीनंतर त्या बिबट्याला पुढील निरीक्षणाखाली ठेवले आहे.

मागाहून त्याला बोंडला वन्यजीव संरक्षण केंद्रात पाठवून देण्यात येईल, असे सूत्रांकडून सांगण्यात आले. दरम्यान, या घटनेतून मानव व वन्यजीव संघर्ष हाताळण्यासाठी वन विभागाचे सुरू असलेले प्रयत्न अधोरेखित होत आहेत.