काणकोण: काणकोणातील दुर्गम भागातील खोतिगावला गेल्या वर्षीचा उत्कृष्ट पर्यटनाचा राष्ट्रीय पुरस्कार प्राप्त झाला आहे. खोतिगाव पंचायत क्षेत्रात निसर्ग पर्यटनाला भरपूर वाव आहे. खोतिगाववासीयांनी आतापर्यंत जपलेल्या पुरातन संस्कृतीमुळे हा पुरस्कार प्राप्त झाला, असे सरपंच आनंदू देसाई यांनी सांगितले.

खोतिगाव पंचायत क्षेत्रात कुस्के हा प्रसिद्ध धबधबा आहे. शिवाय पोर्तुगिजांनी जिलबा राणे यांच्यावर बंदुकीची गोळी झाडली, त्याठिकाणी महादेव देवालय आहे. तसेच जैवविविधतेने समृद्ध असलेले खोतिगाव अभयारण्य आहे. या पंचायत क्षेत्रात यापूर्वी ऑयस्टर मशरूम कल्टिवेशन तसेच बेत (केन) कार्यशाळा झाल्या आहेत.

येथे सेंद्रिय गूळनिर्मिती करण्यात येते, असे माजी सरपंच दया गावकर यांनी सांगितले. खोतिगाव हे पर्यटन क्षेत्र म्हणून विकसित करण्यास भरपूर वाव आहे. खोतिगाव अभयारण्याचा नव्वद टक्के भाग खोतिगाव पंचायत क्षेत्रात आहे. अभयारण्यातील तुळशीमाळ, ट्री टॉप व अन्य पाणवठे पर्यटनदृष्ट्या विकसित केल्यास पर्यटन बहरेल, असे दया गावकर यांनी सांगितले.

खोतिगावातील अतिदुर्गम अशा केरी डोंगरावर असलेल्या वाड्याचा पर्यटनदृष्ट्या विकास करणे गरजेचे आहे. येथे बारमाही तापमान २० अंशांपेक्षा कमी असल्याने हा वाडा थंड हवेचे ठिकाण म्हणून विकसित करणे शक्य आहे. शिवाय रोप-वे व अन्य साहसी उपक्रम या ठिकाणी राबवून निसर्गप्रेमी पर्यटकांना आकर्षित करणे शक्य आहे. याठिकाणी बोरशे हे पवित्र तळे आहे, असे गावकर म्हणाले.