Sal News : साळ, शाळेत विविध कार्यक्रम यशस्वी करण्यासाठी विद्यार्थी व शिक्षकांना पालकांचे सहकार्य अत्यंत महत्त्वाचे असते.

त्यामुळे शाळेची यशस्वी वाटचाल सुरू राहते, असे प्रतिपादन भाग शिक्षणाधिकारी किरण चौकीकर यांनी केले.

पर्वरी येथील प्रबोधन प्राथमिक विभागाचा नुकताच क्रीडा मेळावा झाला. यावेळी प्रबोधन शिक्षण संस्थेचे अध्यक्ष संजय वालावलकर, उल्हास अस्नोडकर, मुख्याध्यापिका डॉ. नीता साळुंखे, पालक शिक्षक संघाचे अध्यक्ष संगम चोडणकर व प्राथमिक विभागाच्या प्रमुख माधुरी सिद्धये आदी उपस्थित होते.

क्रीडा मेळाव्याची सुरवात पाहुण्यांच्या हस्ते मशाल पेटवून करण्यात आली. सूत्रसंचालन ऊर्मिला चोपडेकर यांनी केले. पाहुण्यांचा परिचय डॉ. नीता साळुंखे यांनी करून दिला. आभार नमिता नगर्सेंकर यांनी मानले

मेळाव्यात विविध प्रकारच्या कवायती, रस्सीखेच, कोलांट्या उड्या सादर करण्यात आल्या. यावेळी चौथीच्या विद्यार्थ्यांमधील विशेष गुण हेरून त्यांना विशेष बक्षीसे देण्यात आली.