आसगाव येथील आगरवाडेकर कुटुंबीयांचे घर मोडतोड प्रकरणामुळे वादात सापडलेल्या पोलिस महासंचालक जसपाल सिंग यांची अखेर बदली झाली आहे. आसगाव येथील कारवाईसाठी जसपाल यांचा दबाव होता, असा आरोप झाल्यानंतर त्यांच्या बदलीची मागणी सर्वस्तरातून केली जात होती. अखेर प्रकरण घडल्याच्या वीस दिवसांनतर जसपाल सिंग यांची बदली करण्यात आली आहे.

केंद्रीय गृह खात्याने याबाबत बदली आदेश जारी केले आहेत. गोव्याच्या पोलिस महासंचालकपदाची जबाबदारी अलोक कुमार यांच्याकडे देण्यात आली आहे. अलोक कुमार 1996 बॅचचे आयपीएस अधिकारी आहेत.

आसगाव येथील आगरवाडेकर कुटुंबीयांचे घर मोडतोड प्रकरणानंतर जसपाल सिंग यांच्यावर बदलीची टांगती तलवार होती. हणजूण पोलिस निरीक्षक प्रशल देसाई यांनी राज्य सचिवांना सादर केलेल्या अहवालात जसपाल यांच्यावर गंभीर आरोप करण्यात आले होते. आसगाव येथील कारवाईसाठी जसपाल यांनीच दबाव आणल्याचे या अहवालात म्हटले होते.

यानंतर जसपाल यांच्या बदलीची मागणी जोर धरु लागली होती. जसपाल यांच्या बदलीबाबतचा अहवाल देखील राज्य सरकारने केंद्र सरकारला पाठवला होता. यानंतर जसपाल यांची बदली होणार हे निश्चित झाले होते. अखेर या प्रकरणाच्या वीस दिवसांनंतर जसपाल यांची दिल्लीत बदली झाली आहे.