गोवा काँग्रेसचे नेते, माजी मुख्यमंत्री दिगंबर कामत यांची अखिल भारतीय काँग्रेस वर्किंग कमिटीतून कायम निमंत्रित सदस्य पदावरून हकालपट्टी करण्यात आली आहे. नुकतीच राष्ट्रीय काँग्रेसने याबद्दलची माहिती दिली आहे.

गेले काही दिवस कामत यांच्यावर गोवा भाजपशी जवळीक साधत अनेक काँग्रेस नेत्यांना भाजपमध्ये सामील होण्यासाठी भुमिका घेतल्याचा ठपका ठेवण्यात आला होता. अनेक कारणावरुन गोवा काँग्रेसमध्ये अंतर्गत कलह सुरु होता. याबाबत आता राष्ट्रीय काँग्रेसने हा निर्णय घेतला आहे.

कामत यांनी आमच्या पाठीत खंजीर खुपसला

या पूर्वी गोवा काँग्रेस प्रभारी दिनेश गुंडूराव यांनी कामत यांच्याबाबत बोलताना कामत यांनी आमच्या पाठीत खंजीर खुपसला अशी प्रतिक्रिया दिली होती. तसेच कामत यांनी देखील माध्यमांशी बोलताना आपण नाराज असल्याचं मान्य केले होते. मात्र पक्षांतराबाबत आपला कोणता ही विचार नाही असे ही सांगितले होेते. त्यामूळे काँग्रेसमधील ही धुसफूस थांबेल अशी स्थिती असताना राष्ट्रीय काँग्रेसने कारवाईचा बडगा उचलत कामत यांना मोठा झटका दिला आहे.

मायकल लोबो यांची विरोधी पक्षनेतेपदावरून हकालपट्टी

गेल्या आठवड्यात, काँग्रेसने मायकल लोबो यांची गोवा विधानसभेतील विरोधी पक्षनेते पदावरून हकालपट्टी केली होती. याबाबत स्पष्टीकरण देताना काँग्रेसने म्हटले होते की, भाजप 2/3 विभाजनाचा प्रयत्न करीत आहे. तसेच काँग्रेस नेत्यांना मोठ्या प्रमाणात पैसे देऊ केले आहेत. असा ही आरोप भाजपवर करण्यात आला होता.