गेल्या अनेक दिवसांपासून चर्चेत असलेल्या मोपा विमानतळाच्या उद्घाटनासाठीचे निमंत्रण विरोधी पक्षनेते आणि दक्षिण गोव्याचे खासदार यांना नसल्याने याचा गोवा काँग्रेसने आता संताप व्यक्त केला आहे. यावरुन आज गोवा काँग्रेस प्रदेशाध्यक्ष अमित पाटकर यांनी गोवा सरकारचा शेलक्या शब्दात समाचार घेतला, व भाजपला हे विमानतळ म्हणजे आपली खाजगी मालमत्ता वाटते आहे का? असा सवाल केला.

(Congress leader Amit Patkar criticized the Goa government over Mopa airport invitation)

मोपा हे गोवा राज्यातील दुसरे आंतरराष्ट्रीय विमानतळ आहे. याचे उद्घाटन काही तासांवर आले आहे. पंतप्रधान नरेंद्र मोदी यांच्यासह देशातील अनेक दिग्गज नेते या निमित्ताने गोव्यात येत आहेत. मात्र या उद्घाटनाचे निमंत्रण विरोधी पक्षनेते युरी आलेमाव आणि दक्षिण गोव्याचे खासदार फ्रान्सिस सार्दिन यांना नसल्याने काँग्रेस प्रदेशाध्यक्ष अमित पाटकर यांनी आज गोवा सरकारला चांगलेच फैलावर घेतले.

पाटकर म्हणाले की, ''मोपाच्या उद्घाटनासाठी विरोधी पक्षनेते युरी आलेमाव आणि दक्षिण गोव्याचे खासदार फ्रान्सिस सार्दिन यांचा उल्लेख भाजने जाणिवपुर्वक टाळला आहे. अशा कार्यक्रमांमध्येही भाजपला राजकारण दिसते आहे. असे असेल तर भाजपला हे विमानतळ म्हणजे आपली खाजगी मालमत्ता वाटले आहे का?'' असा थेट सवाल करत, लोकप्रतिनीधींना निमंत्रण असायलाच हवं अशी भुमिका त्यांनी घेतली आहे.