पणजी: आयनॉक्स कोर्टयार्ड आणि जुने गोमॅको रुग्णालयाची वारसा इमारत परिसरात रविवारी (8 डिसेंबर) लागलेल्या आगीला कारणीभूत वेल्डिंग कामाला परवानगी कशी देण्यात आली? अग्निशमन आणि आपत्कालीन सेवा तसेच आपत्ती व्यवस्थापन प्राधिकरण आणि इतर विभागाच्या सर्व परवानग्या आयोजकांनी घेतल्या होत्या का? असा सवाल करत काँग्रेस मीडिया सेलचे अध्यक्ष अमरनाथ पणजीकरांनी हल्लाबोल केला. एवढ्यावरच न थांबता पणजीकरांनी थेट मुख्यमंत्र्यांनाही निशाण्यावर घेतले.

दरम्यान, आयनॉक्स कोर्टयार्डमधील एका मोठ्या मंडपाला आग लागण्याच्या घटनेवर प्रतिक्रिया व्यक्त करताना पणजीकरांनी लोकांचे जीवन धोक्यात आणल्याबद्दल सावंत सरकारवर सडकून टीका केली. वारसा इमारत आणि चार स्क्रिनचे आयनॉक्स चित्रपटगृह यांच्या मधोमध असलेल्या जागेत आयनॉक्सचे सुरक्षा उपव्यवस्थापक सुरज शितोळे यांनी सांगितल्याप्रमाणे आगीला जबाबदार असलेल्या वेल्डिंगच्या कामाला परवानगी कशी मिळाली हे आम्हाला जाणून घ्यायचे आहे, असेही पुढे पणजीकर पुढे म्हणाले.

आम्ही मुख्यमंत्री डॉ. प्रमोद सावंत जे गृहमंत्री आणि गोवा मनोरंजन संस्थेचे अध्यक्ष आहेत यांच्याकडे आगीच्या घटनेवर सविस्तर अहवालाची मागणी करतो. या आगीत सुदैवाने कोणतीही जीवितहानी झाली नाही. जे कोण हलगर्जीपणा व आगीच्या घटनेस जबाबदार आहेत अशा सर्वांवर तात्काळ कोठरात-कठोर कारवाई करण्यात यावी अशी मागणी पणजीकरांनी केली.