मडगाव: काँग्रेसचे गोवा (Congress Goa) प्रभारी दिनेश गुंडू राव (Dinesh Gundu Rao) हे उद्या 4 ऑगस्ट रोजी गोवा दौऱ्यावर येत असून या तीन दिवसांच्या आपल्या गोवा भेटीत ते वेगवेगळ्या ठिकाणच्या काँग्रेस कार्यकर्त्यांना प्रत्यक्ष भेटून त्यांची मते जाणून घेणार आहेत. विधानसभा निवडणुकीच्या तयारीच्या निमित्ताने ते काँग्रेस गट समितीच्या सदस्याबरोबर चर्चा करणार आहेत अशी माहिती गोवा प्रदेश समितीचे उपाध्यक्ष एम. के. शेख (M. K. Sheikh) यांनी दिली.

5 ऑगस्ट रोजी सकाळी ते सांगेच्या दौऱ्यावर जाणार असून सकाळी 11 वाजता सांगे येथील गुरुकुल सभागृहात त्यांची काँग्रेस गट समितीकडे चर्चा होणार आहे. सायंकाळी 5 वाजता ते कुडचडेच्या काँग्रेस कार्यकर्त्यांना भेटणार असून सायंकाळी 6.30 वाजता बाळ्ळी येथील मल्लिकार्जुन सभागृहात केपेच्या गट कार्यकर्त्यांना भेटणार आहेत.

6 रोजी सकाळी 11 वाजता ते श्रीस्थळ येथील मल्लिकार्जुन सभागृहात काणकोणच्या गट कार्यकर्त्यांना भेटणार असून नंतर सायंकाळी 4 वाजता लोयोला फुर्तादो वाचनालय सभागृहात वेळ्ळी गट समितीच्या तर सायंकाळी 5.30 वाजता कुंकळ्ळी गट समिती कार्यकर्त्यांना मार्डीकट्टा येथील बहुउद्देशी सभागृहात भेटून चर्चा करणार आहेत. यातील केपे, कुंकळ्ळी, वेळ्ळी व काणकोण येथे काँग्रेसचे निवडून आलेले आमदार भाजपात गेल्याने त्यांच्या जागी कुणाला उमेदवारी द्यावी यावर अद्याप एकमत होत नसून सांगे येथील अपक्ष आमदार प्रसाद गावकर याना काँग्रेस पक्षात घेण्यास स्थानिक कार्यकर्त्याचा विरोध आहे.