Margao News "काणकोण येथे जी बेकायदेशीर वृक्षतोड झाली आहे त्‍यात सभापती रमेश तवडकर यांचा हात असून त्‍यात वन खात्‍याचे अधिकारीही सामील आहेत" अशा आशयाची तक्रार काँग्रेस नेते जनार्दन भंडारी व गोवा फॉरवर्ड नेते विकास भगत यांनी दक्षिण गोवा उप वनपालाकडे केलीय. या प्रकरणी तवडकर व अन्‍य अधिकार्‍यांविरोधात गुन्‍हा नोंद करावा अशी मागणी देखील त्यांनी केली आहे.
आज मडगाव येथील कार्यालयात भगत व भंडारी यांनी ही तक्रार दिली. काणकोण येथील एका साॅ मिलमध्‍ये मोठ्या प्रमाणावर लाकूड कापले जात असल्‍याचे उघडकीस आल्‍यावर आपण जाऊन तेथे चौकशी केली असता हे लाकूड रमेश तवडकर यांनी आणून ठेवले आहे अशी माहिती तेथील कामगारांनी आपल्‍याला दिली.
या लाकडामध्‍ये सागवान, माट्‍टी सारख्‍या लाकडाचाही समावेश आहे. ही बेकायदेशीर लाकडे त्‍या वखारवाल्‍याला चिरण्‍यासाठी वनखात्‍याच्‍या अधिकार्‍यांनी दबाव आणला होता.
यातून तवडकर यांच्‍यासह वन अधिकार्‍यांचा या प्रकरणात हात असल्‍याचे उघड होत असून याप्रकरणी त्‍यांच्‍यावर गुन्‍हा नोंद करुन त्‍यांना त्‍वरित अटक करावी अशी मागणी या तक्रारीत करण्‍यात आली आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.