पणजी : गोव्यात सध्या कोरोनासह ओमिक्रॉन व्हेरिएंटचाही धोका वाढला आहे. दिवसाला हजारोंच्या संख्येने कोरोनाबाधित सापडत असल्याने चिंतेत वाढच झाली आहे. बुधवारी गोव्यात सापडलेल्या आठ ओमिक्रॉन बाधितांपैकी 5 जणांची कोणतीही ट्रॅव्हल हिस्टरी नसल्याने समूह संसर्गाची भीती व्यक्त केली जात आहे.

गोव्यात सध्या ओमिक्रॉन व्हेरिएंटचे (Omicron Variant) तब्बल 19 रुग्ण सापडले आहेत. कोरोना रुग्णसंख्येतही झपाट्याने वाढ होत असल्याचं चित्र आहे. असं असलं तरीही गोवा सरकारने राज्यात अद्याप कोणतेही निर्बंध (Restrictions) लादलेले नाहीत. ज्याचा फटकाही राज्याला दररोज बसतो आहे. कोरोना रुग्णसंख्या सातत्याने वाढतानाच दिसत आहे.

गोव्यात सध्या 15 ते 18 वयोगटातील मुलांचं लसीकरण सुरु आहे. केवळ लसीकरणासाठीच मुलांना शाळेत बोलावण्याचे निर्देश सरकारने दिले आहेत. शाळा बंद असल्याने विद्यार्थ्यांना कोरोनाचा धोका कमी झाला असला तरीही शाळा (School) बंद करण्यात सरकारने केलेली दिरंगाई टीकेचा विषय ठरत आहे.