पणजी: गोवा तृणमूल कॉंग्रेसच्या प्रभारी आणि खासदार महुआ मोईत्रा यांनी आज कॉंग्रेसला खडे बोल सुनावले. पत्रकारांशी बोलताना त्यांनी कॉंग्रेसवर टीकास्त्र चालवले, मात्र त्याच बरोबर भाजपला नेस्तनाबूत करण्यासाठी कॉंग्रेस आणि आम आदमी पार्टीला (AAP) तृणमूल कॉंग्रेस बरोबर येऊन 'भाजपविरोधी' आघाडी स्थापन करण्याचेही आवाहन केले. (Mahua Moitra TMC Goa Election Latest News)

महुआ मोईत्रा म्हणाल्या, "कॉंग्रेस (Congress) एकट्याने ही लढाई लढू शकत नाही. 2017 मध्ये भाजप पेक्षा जास्त जागा जिंकूनही त्यांना सरकार बनवता आले नाही. कॉंग्रेसमध्ये नेत्यांनी प्रवेश केला तर त्यांचं स्वागत केले जाते, मात्र नेते दुसऱ्या पक्षात गेले तर कॉंग्रेस त्यांच्यावर टीका करतो. कॉंग्रेसने दुसऱ्यांना सर्टिफिकेट देणे थांबवावे आणि जागे व्हावे. कॉंग्रेसने त्यांचे कामं केले नाही म्हणून आम्हाला लोकांसाठी पर्याय व्हावं लागतं आहे."

त्यांनी बोलताना ममता बॅनर्जी (Mamata Banerjee) यांचा भाजपविरोधी आघाडीच्या नेत्या असा उल्लेख केला. आघाडीबद्दल बोलताना त्यांनी आप आणि कॉंग्रेस समोर मैत्रीचा हात पुढे केला. त्या म्हणाल्या, "आम्ही भाजपविरोधी आघाडीसाठी तयार आहोत. राज्यात भाजप विरुद्ध भाजपविरोधी आघाडी अशी लढाई आहे. आप आणि कॉंग्रेसने यामध्ये सामील व्हावे, असेही मोईत्रा पुढे म्हणाल्या.