Lala Ki Basti Goa

वाढत्या चोऱ्या अन् गुन्हेगारीच्या पार्श्वभूमीवर कोलवाळ पोलिसांनी गुरुवारी (ता. 23) माडेल-थिवी येथील लाला की बस्ती या परिसरात सकाळच्या सत्रात भाडेकरु पडताळणी मोहीम राबवली.

या मोहिमेदरम्यान सुमारे 97 लोकांची तपासणी केली गेली. यातील 96 जणांकडे आवश्यक कागदपत्रे नव्हती. त्यामुळे वरील लोकांना 41 सीआरपीसी अंतर्गत अटक करण्यात आली.

एखाद्या संबंधितास घरमालकांनी भाडेकरू ठेवल्यास त्यांची अधिकृत कागदपत्रे पोलिस स्थानकात जमा करायची असतात. मात्र, कायदेशीर प्रक्रिया पूर्ण न केल्याने पोलिसांनी ही कारवाई राबवली.

दरम्यान, पोलिस निरीक्षक विजय राणे यांच्या मार्गदर्शनाखाली मोहीम हाती घेण्यात आली. गोवा हे पर्यटन राज्य असल्याने बिगर गोमंतकीय मजूर वर्गाचा भरणा मोठ्या प्रमाणात येथे होतो. यातील काहींकडे आवश्यक कागदपत्रे वैगेरे नसतात.

तसेच, अनेकदा अशा लोकांचा चोरी आणि इतर गुन्ह्यांत समावेश असतो, असे पोलिस आकडेवारीतून वारंवार ही घडकीस आले आहे. हे मजूर मिळेल तिथे भाडेपट्टीवर राहतात.

याशिवाय, ते एखाद्या गुन्ह्यात सहभागी असल्यास पोलिस त्यांच्या पत्त्यावर माहिती घेण्यास पोहोचेपर्यंत ते अन्यत्र पळून गेलेले असतात. परिणामी पोलिस तपासात आडकाठी येते. त्यामुळे भाडेकरु पडताळणी यासारखी मोहीम गरजेची असते.

वाढत्या गुन्ह्यांमुळे झाडाझडती

पोलिसांकडून वेळोवेळी भाडेकरु पडताळणी अर्ज भरण्याचे आवाहन केले जाते. तसेच, मोहीम तीव्र केली जाते; परंतु काही दिवसांनी पुन्हा ती थंडावते. सध्या चोऱ्या तसेच सोनसाखळी हिसकावण्याचे प्रकार वाढल्याने ही मोहीम कोलवाळ पोलिसांनी आपल्या हद्दीत राबवली.