डिचोली: शहरातील एका हॉटेलच्या बाहेर झालेल्या मारामारीत दोन महाविद्यालयीन विद्यार्थी जखमी झाले. शहरातील जुन्या बसस्थानक परिसरातील एका हॉटेलजवळ मारामारीचा हा प्रकार काल (बुधवारी) रात्री साडेअकरा वाजण्याच्या सुमारास घडल्याची माहिती मिळाली आहे.

मारामारीचे नेमके कारण स्पष्ट होऊ शकले नाही. मात्र, मिळालेल्या माहितीनुसार, 'गर्लफ्रेंड' वरून ही मारामारी झाल्याची शक्यता आहे. तशी चर्चाही शहरात सुरू आहे. जखमी विद्यार्थी एकाच महाविद्यालयातील असून, एक शहरातील तर दुसरा मये परिसरातील असल्याची माहिती मिळाली आहे. दरम्यान, या मारामारीसंदर्भात मात्र कमालीची गुप्तता पाळण्यात आली आहे.

वादाचे पर्यवसान मारामारीत

मिळालेल्या माहितीनुसार, बुधवारी सकाळी महाविद्यालयात या विद्यार्थ्यांमध्ये वाद निर्माण झाला होता. रात्री या वादाचे मारामारीत रूपांतर झाले. मारामारीची माहिती मिळताच डिचोली पोलिसांनी रात्रीच घटनास्थळी धाव घेतल्याने अनुचित प्रकार टळला. याप्रकरणी पोलिसांनी अदखलपात्र गुन्हा नोंद करून ते पुढील तपास करीत आहेत