बोरी : येथील झुआरी नदीच्या पात्रात असलेल्या भग्न चौथऱ्यांमुळे बार्जेस, होड्या आणि बोटींच्या सुरक्षिततेवर मोठा प्रश्नचिन्ह निर्माण झाला असून, रात्रीच्या वेळी गंभीर अपघात होण्याची भीती स्थानिक मच्छीमार आणि जलवाहतुकीशी संबंधित व्यक्तींनी व्यक्त केली आहे.

बोरी परिसरात झुआरी नदीवर एक मुख्य पूल आहे. त्याच्या बाजूला झुआरी ॲग्रो केमिकल (वास्को) या खत कारखान्याला ‘ओपा’ जलप्रकल्पातून पाणी पोहोचवण्यासाठी एक पाईपलाईन टाकण्यात आली होती. त्यासाठी एक लहान पूल उभारण्यात आला होता. मात्र, सध्या या कारखान्याला साळावली धरणातून पाणी पुरवठा होत असल्याने बोरीतील पाईपलाईन आणि पूल निष्क्रिय झाला आहे.

कालांतराने या लहान पुलाची देखभाल न झाल्याने तो मोडून पडला. मात्र, पुलाचे खांबाचे चौथरे नदीच्या पात्रात तसेच शिल्लक आहेत. हे चौथरे ओहोटीच्या वेळी स्पष्ट दिसतात, पण भरतीच्या वेळी पाण्याखाली जातात. त्यामुळे रात्रीच्या अंधारात बार्जेस किंवा बोटी चालवणाऱ्यांना हे अडथळे दिसत नाहीत, आणि मोठ्या अपघातांचा धोका संभवतो.

स्थानिक नागरिक आणि मच्छीमार संघटनांनी प्रशासनाला वारंवार याकडे लक्ष वेधूनही ठोस उपाययोजना झालेली नाही. या भग्न चौथऱ्यांचे तातडीने हटवले जावे, अशी जोरदार मागणी आता पुन्हा एकदा होत आहे.