फोंडा: कोडार येथील नियोजित आयआयटी प्रकल्पाच्या विरोधात बेतोडा, कोनशे, कोडार, निरंकाल पंचायतीने विशेष ग्रामसभा घेण्याची जोरदार मागणी करीत शुक्रवारी पंचायतीला एक निवेदन दिले.

सध्या आयआयटी विरोध वाढत चालला असून विविध राजकीय पक्षांचा पाठिंबा स्थानिकांना मिळत असल्याने त्यांचे पारडे जड झाले आहे. आता ग्रामस्तरावरील विरोध प्रखरपणे समोर येण्यासाठी बेतोडा, कोनशे, कोडार, निरंकाल पंचायतीने विशेष ग्रामसभा बोलवावी, अशी जोरदार मागणी स्थानिकांनी केली आहे.

या विशेष ग्रामसभेसाठी एक निवेदन विश्राम गावकर व इतर ग्रामस्थांनी सरपंच मधू खांडेपारकर यांना सुपूर्द केले असून पंचायतीकडून पूर्ण पाठिंबा अपेक्षित केला आहे. विश्राम गावकर यांनी लोकांचा वाढता विरोध असल्यामुळे सरकारला कोडार येथील आयआयटी धोरण मागे घ्यावे लागणार असल्याचे स्पष्ट केले. कोडार गावातील नैसर्गिक समृद्धी कदापि नष्ट होऊ देणार नसल्याचे यावेळी स्पष्ट केले.

तवडकरांचा पाठिंबा हवा!

कोडारवासीयांनी कला संस्कृती मंत्री रमेश तवडकर यांना एक निवेदन सादर केले असून त्यांच्या पाठिंब्याची अपेक्षा व्यक्त केली. ज्ञानेश्वर खांडेपारकर यांनी सर्व संबंधितांना निवेदने सादर केली जाणार असून कोडार गावात आयआयटी नकोच असल्याचा पुनरुच्चार केला आहे.

कोडारवासीयांच्या एकजुटीमुळे सरकारी यंत्रणा अस्वस्थ झाली असून वाढता विरोध पाहून नियोजित आयआयटीला गाशा गुंडाळावा लागणार असल्याचा रंग दिसत असल्याचे फोंडावासीयांचे मत आहे.