पणजी: राज्यात अजूनही नारळाचे दर आवाक्यात आलेले नाहीत. बाजारात मध्यम आकाराचा नारळ हा ३० ते ३५ रुपयांना विकला जात आहे. तर मोठ्या आकाराचा नारळ ५० ते ६० रुपयांना विकला जात आहे.

स्थानिक भाज्यांना पणजी बाजारात चांगली मागणी आहे. सध्या चिबूड, काकडी आदी विक्रीसाठी मोठ्या प्रमाणात दाखल होत असून अनेक ग्राहक ते आवर्जून खरेदी करत आहेत. राज्यात गेल्या आठवड्यापासून भाज्यांचे दर स्थिर आहेत;

परंतु आठवड्याभरापूर्वी ३० ते ३५ रुपये प्रतिकिलो दराने विकला जाणारा टोमॅटो आता ३५ ते ४० रुपये प्रतिकिलो दराने विकला जात आहे. इतर भाज्याही जसे कांदा, बटाटा प्रतिकिलो ४० रुपयांनी विकले जात आहेत.

चतुर्थी, दसरा उत्सवादरम्यान भाज्यांना मोठ्या प्रमाणात मागणी होती. परंतु येत्या काळात भाज्यांचे दर स्थिरावतील, असे पणजीतील विक्रेत्यांना सांगितले. पणजी बाजारात गाजर ६० रुपये, काकडी ५० रुपये, भेंडी ७०, कारली ८० रुपये प्रतिकिलो दराने विकली जात आहेत.