पणजी : राज्याला विविध क्षेत्रांत कौशल्य विकास संस्थांची गरज आहे. अभियांत्रिकी महाविद्यालये आणि तंत्रशिक्षण संचालनालयाला केवळ पायाभूत सुविधाच नव्हे तर कौशल्य विकासातही सुधारणा करण्याचा सरकार विचार करत आहे, अशी माहिती मुख्यमंत्री डॉ. प्रमोद सावंत यांनी दिली.

फायर अॅण्ड सिक्युरिटी असोसिएशन ऑफ इंडियाने (एफएसएआय) गोवा कॉलेज ऑफ इंजिनिअरिंग यांच्या संयुक्त विद्यमाने फर्मागुढी-फोंडा येथे सुरू केलेल्या एफएसएआयच्या कौशल्य विकास केंद्राच्या (एफएसडीसी) उद्‌घाटनप्रसंगी ते बोलत होते.

आयआयटी, एनआयटी, जीआयएम, बीआयटीएस पिलानी आणि इतर अभियांत्रिकी महाविद्यालयांच्या मदतीने राज्याच्या मनुष्यबळाचा कुशल मनुष्यबळात विकास करण्यासाठी सरकार सर्वतोपरी प्रयत्न करत आहे. त्यासाठी समिती स्थापन केली जाणार असल्याचे मुख्यमंत्र्यांनी सांगितले.
मुख्यमंत्र्यांनी एफएसएआयला एफएसडीसीमार्फत राज्य सरकारच्या औद्योगिक प्रशिक्षण संस्थांमध्ये अभ्यासक्रम सुरू करण्याचा सल्ला दिला. अग्निशामक आणि आपत्कालीन खात्यात या प्रकारचे सरकारमान्य अभ्यासक्रम पूर्ण केलेल्या उमेदवारांना प्राधान्य देण्याचा विचार सरकार करणार आहे. त्यासाठी भविष्यात भरती नियमातही बदल करण्यात येणार असल्याचे त्यांनी सांगितले.

एफएसएआय, ओ आणि जी उद्योगचे अध्यक्ष मुकेश शाह यांनी एएएजी, शाह भोगीलाल जेठालाल आणि ब्रदर्स यांच्यावतीने एफएसएआयच्या कौशल्य विकास केंद्रासाठी देणगी म्हणून 5 लाखांचा धनादेश सुपूर्द केला. प्रा. डॉ. राजेश लोहानी आणि अजित राघवन यांनी सामंजस्य कराराची देवाणघेवाण केली. मुख्यमंत्र्यांच्या हस्ते एफएसएआय सुरक्षा निर्देशांक जर्नलचे प्रकाशन करण्यात आले.