Goa Traffic: अटल सेतुवर सुरू असलेल्या कामामुळे या पुलावरून वाहतूक बंद आहे. त्याचा परिणाम पणजीतील वाहतुकीवर झाला आहे. गेल्या पाच दिवसांपासून पणजीत मोठ्या प्रमाणात वाहतूक कोंडीला सामोरे जावे लागत आहे.

यातून वाहनधारक, नागरिक, पर्यटकांना होत असलेल्या त्रासाची दखल घेत आता अटल सेतुवरील एक भाग आज, शनिवारी (ता. 25) संध्याकाळपासून वाहतुकीसाठी खुला केला जात आहे. खुद्द मुख्यमंत्री डॉ. प्रमोद सावंत यांनीच ही माहिती दिली आहे.

अटल सेतूचा फोंड्याकडील एक भाग आजपासून वाहनधारकांसाठी खुला करण्यात येणार आहे. मेरशी जंक्शन येथे वाहतूक कोंडी होऊ नये, म्हणून हा निर्णय घेण्यात आला आहे. पर्वरीत वाहतूक कोंडी होऊ नये म्हणून म्हापसा रस्त्याची एक बाजू येत्या 5 दिवसात खुली केली जाईल. तर दहावीच्या परिक्षेच्या पार्श्वभुमीवर अटल सेतूची एक बाजू 2 एप्रिलपासून खुली करण्यात येईल, अशीही माहिती देण्यात आली आहे.

अटल सेतुवरील काम सुरू असल्याने तो वाहतुकीसाठी बंद आहे. शिवाय जी-२० बैठकीच्या पार्श्वभुमीवर शहरातील काही रस्त्यांचे डांबरीकरण सुरू आहे. तसेच पणजीमध्ये स्मार्ट सिटीची विविध कामे सुरू आहेत. त्यासाठी रस्ते खोदून ठेवले आहेत.

त्यामुळे रस्ते वाहतूकीची पुर्ण फज्जा उडाला आहे. शहरात सातत्याने वाहतूक कोंडी होत आहे. गेल्या पाच दिवसात तर हे प्रमाण खूप वाढले आहे.

नुकतेच वीजमंत्री सुदिन धवळीकर यांनीही या वाहतूक कोंडीच्या पार्श्वभुमीवर मंत्र्यांना एक सूचना केली होती. सोमवारपासून सुरू होत असलेल्या गोवा विधानसभेच्या अधिवेशनाला येताना एक ता आधीच यावे, म्हणजे वाहतूक कोंडीत अडकून अधिवेशनात पोहचायला विलंब व्हायला नको, अशी सूचना त्यांनी मंत्र्यांना केली होती.