साखळी: सरकारी कर्मचारी हे वास्तविक जनतेचे सेवक असतात. आपल्याकडे कामासाठी येणाऱ्या लोकांशी सोज्वळ व नम्रतेने वागल्यास लोकांकडूनही आपणास चांगली वागणूक मिळते. आपण जरी मुख्यमंत्री असलो तरी आपले कर्तव्य हे लोकांची कामे करणे आहे.

हे पद लोकांच्या कल्याणासाठी असून आपण स्वतःला मुख्यमंत्री असे मानत असताना सर्वप्रथम जनतेचा ‘मुख्यसेवक’ आहे, हे ध्यानात ठेवून वागतो व लोकांची कामे करतो, असे प्रतिपादन मुख्यमंत्री डॉ. प्रमोद सावंत यांनी साखळी रवींद्र भवनात केले.

साखळी रवींद्र भवन येथे शासकीय कर्मचारी सांस्कृतिक मंचतर्फे कला व संस्कृती खाते यांच्या संयुक्त विद्यमाने आयोजित केलेल्या राज्य पातळीवरील पाचव्या कला सृजनोत्सव २०२५ या कार्यक्रमाच्या उद्‌घाटन सोहळ्यात मुख्यमंत्री बोलत होते. यावेळी कला व संस्कृती खात्याचे संचालक विवेक नाईक, शासकीय कर्मचारी सांस्कृतिक मंचच्या अध्यक्षा बिंदीया वस्त, निवृत्त सदस्य सचिव स्वाती दळवी व इतरांची उपस्थिती होती.

मान्यवरांच्या हस्ते समई प्रज्वलित करून या कार्यक्रमाचे उद्‌घाटन करण्यात आले. दोन दिवस चालणाऱ्या या ‘कला सृजनोत्सव’ कार्यक्रमात गोवाभरातील सरकारी कर्मचाऱ्यांमध्ये विविध कला व सांस्कृतिक कार्यक्रम, स्पर्धा होणार आहेत. सुमारे १,२०० सरकारी कर्मचाऱ्यांचा त्यात समावेश आहे.