Goa Assembly Session 2023: राज्यात अनुसूचित जमातींना (ST) पुढच्या विधानसभा निवडणुकीआधी आरक्षण देऊ, असे आश्वासन मुख्यमंत्री डॉ. प्रमोद सावंत यांनी मंगळवारी, विधानसभेत दिले.

मुख्यमंत्री सावंत म्हणाले की, अनुसूचित जमातींना आरक्षण देण्यास आमचे सरकार तयार आहे. 2027 च्या विधानसभा निवडणुकीआधी अनुसूचित जमातींना आरक्षण मिळवून देऊ. त्यासाठी केंद्र सरकारकडे पत्रव्यवहार केला जाईल.

केंद्राकडे मतदारसंघ पुनर्रचना आयोगाची रचना करावी, अशी मागणी केली जाईल. एकदा हा मतदारसंघ पुनर्रचना आयोग तयार झाला की, अनुसूचित जमातींना विधानसभेत आरक्षण मिळण्याचा मार्ग मोकळा होईल. आम्ही याचा पाठपुरावा करत राहू आणि आरक्षण मिळवून देऊ.

राज्यात अनुसूचित जमातींनी (ST) आरक्षणाचा मुद्दा गेल्या काही काळापासून गाजत आहे. या अर्थसंकल्पीय अधिवेशनाच्या आधीही अनुसूचित जमातीच्या आरक्षणाचा प्रश्न मार्गी लावावा म्हणून संबंधित संघटनांनी विरोधी पक्षनेते युरी आलेमाव, गोवा फॉरवर्ड पक्षाचे आमदार विजय सरदेसाई यांची भेट घेतली होती.

या दोन्ही नेत्यांना निवेदन देऊन हा विषय विधानसभेत मांडण्याची विनंती शिष्टमंडळाने केली होती. त्यावर दोन्ही नेत्यांकडून शिष्टमंडळाला तसे आश्वासनही देण्यात आले होते.