साखळी: राज्यात भाडेकरू पडताळणी धोरण अवलंबल्यानंतर सर्वत्र भाडेकरू पडताळणी सुरू आहे. गुरूवार, १० ऑक्टोबर ही यासाठी अखेरची तारीख होती. परंतु अजूनही भाडेकरू पडताळणी नोंदणी करायची शिल्लक असल्याने पुढील चार-पाच दिवसांत लोकांनी आपल्याकडील भाडेकरूंची पडताळणी नोंदणी पोलिस स्थानकात करून घ्यावी. त्यानंतरही कोणी केली नसल्यास पोलिस थेट संबंधित मालकांवर दंडात्मक कारवाई करतील, असे मुख्यमंत्री डॉ. प्रमोद सावंत यांनी साखळीत पत्रकारांशी बोलताना सांगितले.

गोव्यात मोठ्या प्रमाणात होत असलेल्या गुन्ह्यांवर अंकुश ठेवण्यासाठी तसेच गुन्हा केल्यानंतर खऱ्या गुन्हेगारांची माहिती पोलिसांकडे रहावी या उद्देशाने पोलीस खात्याकडून भाडेकरू पडताळणी नोंदणी केली जात आहे. गोवेकरांच्या सुरक्षिततेसाठीच ही मोहीम राबविण्यात आली असून त्यास लोकांनीही सहकार्य करावे.

पोलिस खाते यासाठी लोकांना सहकार्य करीत आहे. या नोंदणीसाठी पोलीस रू. २०० घेत असल्याची अफवा काहींनी उठवली आहे. ती त्यात तथ्य नसून अफवांना बळी न पडता लोकांनी स्वतःहून आपल्याकडील भाडेकरूंची पडताळणी नोंदणी करावी, त्यांचे ओळखपत्र पोलिसांकडे द्यावे. यासाठी पुढील ४-५ दिवस अतिरिक्त घेऊ शकतात. परंतु नंतरही पडताळणी केली नसल्याचे आढळल्यास पोलिस दंडात्मक कारवाई करतील. कोणाचीही गय केली जाणार नाही,असेही मुख्यमंत्री डॉ. सावंत यांनी सांगितले.दरम्यान,म्हापसा पोलिस स्थानकासमोर पडताळणीसाठी गर्दी झाली होती.