पणजी : लवकरच गोव्यात खाण उद्योग पुन्हा सुरु करण्याचे संकेत मुख्यमंत्री डॉ. प्रमोद सावंत यांनी दिले आहेत. खाण लिलाव येत्या 4 महिन्यात पूर्ण झाला तर 5 महिन्यात खाणी पुन्हा सुरु करणार अशी घोषणा मुख्यमंत्र्यांनी केली आहे. मात्र या खाणींच्या लिलावादरम्यान एका मालकाला 10 किमी पेक्षा जास्तीचा परिसर घेता येणार नाही.

लिलावात स्थानिक कंपन्यांना प्राधान्य देण्याची मागणी फातोर्ड्याचे आमदार विजय सरदेसाई यांनी केली आहे. खाण अवलंबितांनी नुकतीच गोवा फॉरवर्डचे सर्वेसर्वा आणि फातोर्ड्याचे आमदार विजय सरदेसाई यांची भेट घेतली होती. यावेळी खाणप्रश्नी आवाज उठवणार असल्याचं ग्वाही सरदेसाईंनी अवलंबितांना दिली होती. आज विधानसभेत सरदेसाईंनी खाणप्रश्नी सरकारला थेट सवाल केला. यावेळी मुख्यमंत्र्यांनी खाणी सुरु करण्याचे सरकारचे प्रयत्न सुरु असून येत्या 5 ते 6 महिन्यात खाणी सुरु करणार असल्याची माहिती दिली.

विधानसभा निवडणुकीच्या आधी भाजपकडून खाणी सुरु करण्याचं आश्वासन देण्यात आलं होतं. मात्र विविध कारणांनी त्यात विघ्न येत होती.

दरम्यान ‘राज्य सरकारने खाणी बंद करण्याचा आदेश दिल्याने आमच्या कंपनीतील कामगारांना कामावरून काढून टाकण्याची परवानगी द्या’, अशी मागणी वेदांता सेसा कंपनीने केंद्र सरकारकडे केली होती. यासाठी तीन महिन्यांची नोटीस देण्यात आली असून ऑक्टोबरपर्यंत आपले सर्व कामकाज बंद करण्याचे संकेत वेदांताने याचिकेत दिले होते.

सरकारने आमची लिजेस बंद करून खाणीवरील सर्व सामग्री काढून घेण्याचा आदेश दिल्याने त्यामुळे नाईलाजाने हा निर्णय घ्यावा लागत आहे. आमची कंपनी ही कामगारांची हित पाहणारी असून गोव्यातील खाण व्यवसायावर काही तरी तोडगा निघेल अशी आमची आशा होती, असं कंपनीने म्हटलं होतं.