Panaji Road Block : गेल्‍या दोन दिवसांत पडलेल्‍या मुसळधार पावसामुळे पणजीत अनेक ठिकाणी पाणी तुंबण्याच्या घटना घडल्या. शहरातील प्रमुख 18 जून मार्गावरील दुकाने आणि मळा येथे घरांमध्ये पाणी शिरल्याने लोकांना मन:स्‍ताप सहन करावा लागला. नाराज झालेल्या या लोकांनी त्‍यासाठी पणजी मनपाला जबाबदार धरले. त्यानंतर मनपाने शहरातील नाले आणि गटार सफाईचे काम हाती घेतले आहे.

काल सकाळपासून जोरदार पाऊस सुरू झाल्यानंतर अवघ्या काही तासांतच पणजीत पाणी तुंबले. 18 जून मार्ग पाण्याखाली गेल्याने लोकांची तारांबळ उडाली.

तसेच वाहतूक कोंडीही झाली. तर, मळा येथील फोन्‍तेहास परिसरातील घरांमध्ये पाणी शिरल्याने लोकांचे हाल झाले. त्यानंतर आज सकाळी पावसाने किंचित विश्रांती घेतल्यानंतर मनपा कर्मचाऱ्यांनी शहरातील नाले आणि गटारांच्‍या सफाईचे काम हाती घेतले आहे.