Rumdamol Panchayat रुमडामळ-दवर्ली येथील ग्रामसभा बेकायदा मदरशाच्या वादावरून गाजली. ग्रामस्थ आणि पंच सदस्यांमध्ये निर्माण झालेला वाद उफाळू नये म्हणून अखेर पोलिसांना पाचारण करावे लागले.

गेल्या सहा महिन्यांपासून प्रभाग 3 मध्ये एका घरात सुरू असलेल्या बेकायदा मदरशावरून स्थानिकांमध्ये वाद सुरू आहे. हा मदरसा बंद करावा, तो कायदेशीर आहे की नाही याची चौकशी करावी, मदरशात नेमके काय चालते याची पाहणी करावी, असे स्थानिकांनी पंचायत मंडळाला सांगितले.

पण सरपंच मुबिना फणिबंद यांनी यासंदर्भात काहीच निर्णय न दिल्याने आज ग्रामसभेत वाद उफाळून आला. सरपंच फणिबंद या ग्रामसभेला गैरहजर होत्या. उपसरपंच मुस्तफा यांच्या अध्यक्षपदाखाली ही सभा झाली.

सरपंच वारंवार रजेवर

या मदरशासंदर्भात सरपंचांनी सावध राहिले पाहिजे. यावरून काही वेगळे घडले तर त्याला सरपंच जबाबदार असतील. सरपंच फणिबंद या बेकायदा बांधकामांना लाच घेऊन परवाना देतात. तसेच एकाच समाजाच्या बाजूने निर्णय घेतात.

त्या दर 15 दिवसांनी रजेवर जातात. त्यामुळे पंचायतीच्या कामकाजावर परिणाम होत असल्याची तक्रार पंच वळवईकर यांनी केली.

रात्री भीतीचे वातावरण

एका महिलेने सांगितले की, या मदरशामुळे आम्हाला पुष्कळ त्रास सहन करावा लागतो. रात्री येथून जाताना भीतीचे वातावरण असते. रस्ते अडविले जातात. यासंदर्भात उपसरपंच मुस्तफा म्हणाले की, आम्ही हा प्रश्न सोडविण्यासाठी एक महिन्याची मुदत मागितली आहे.

व्यवस्थित चौकशी करून निर्णय घ्यायला वेळ हवा. तसेच 6 तारखेला बीडीओंकडे यासंदर्भात सुनावणी आहे. त्यांचा निर्णय काय होतो, तेही पाहावे लागेल.