वास्को: मडगाव-पणजी मुख्य रस्त्यावर कुठ्ठाळी-आगशी दरम्यान वाहतुकीची कोंडी ही आता नित्याचीच बाब ठरू लागलेली असली तरी गेले काही दिवस ती मोठ्या प्रमाणात होऊ लागली आहे. त्यामुळे या एक तासाच्या प्रवासाला आत अडीच ते तीन तास लागू लागले आहेत. त्यामुळे प्रवासी व वाहन चालकांच्या सहनशक्तीचा अंत होताना दिसत आहे.

(Citizens demand to solve Cortalim to Agassaim traffic jam problem)

नव्या जुवारी पुलाच्या बांधकामामुळे हे प्रकार होत आहेत. हे खरे असले तरी वाहतूक पोलिस व वाहतूक खाते यांनी या प्रकरणी सुधारणा करण्यासाठी काहीच प्रयत्न केले जात नसल्याचे आरोप आता होऊ लागले आहेत. या भागात सामान्य वाहतूक पोलिस व होमगार्डच्या खांद्यावर जबाबदारी सोपवून वरिष्ठ अधिकारी आराम करत आहेत, असेच चित्र आहे अधिकाऱ्यांनी या भागात प्रत्यक्ष हजर होऊन त्यावर उपाय शोधण्याचे प्रयत्न केलेले नाहीत, असा आरोप या मार्गावर रोज प्रवास करणारे प्रवासी उघडपणे करताना दिसत आहेत.

मिळालेल्या माहितीनुसार, आगशी बगलमार्गावरून विमानतळाकडे जाणाऱ्या टॅक्सी ह्या वाहतूक खोळंबलेली असतानाही तिसरी रांग करून पुढे जातात व त्यामुळे पुढे आणखी कोंडी होते. या सर्व समस्येवर मात करण्यासाठी या भागांत वाहतूक पोलिस अधिकारी व वाहतूक खात्याचे निरीक्षक तैनात करावेत, अशी मागणीही लोक करत आहेत. मागे मुख्यमंत्री प्रमोद सावंत यांनी या स्थितीची प्रत्यक्ष पाहणी केली होती व सूचना दिल्या होत्या; पण नंतर त्या सूचना तशाच राहिल्या.

जुवारी पुलाजवळ कुठ्ठाळी फेरी धक्क्याकडे जाणारा रस्ता तसेच आगशी बाजूने आगशी-गोवा वेल्हाकडे जाणाऱ्या रस्त्यावरील नाका हीच वाहतूक खोळंबण्याची मुख्य केंद्रे ठरतायेत. त्यामुळेच वाहतूक खोळंबते. दरम्यान आज कुठ्ठाळी-आगशी दरम्यान वाहतुकीची कोंडी निर्माण होऊन कुठ्ठाळी जंक्शन ते सांकवाळ, तसेच या व्यतिरिक्त कुठ्ठाळी जंक्शन ते संत्रात व कुठ्ठाळी जंक्शन ते आगशी दरम्यान चक्का जाम झाल्याचे चित्र आहे.