नव्या वर्षाची चाहूल घेऊन येणाऱ्या नाताळ उत्सव दोन दिवसांवर येऊन ठेपल्याने सर्वत्र बाजारपेठा फुलून निघाल्या आहेत. अनेक दुकाने सजावटीसाठीच्या साहित्यांनी सजली आहेत. पर्यटकांची संख्याही वाढू लागल्याने उत्सवाचे वातावरण निर्माण झाले आहे. गोठे सजावटीच्या कामाला युवक व्यस्त असल्याने नाताळ सणाचा माहोल तयार झाला आहे.

वास्कोत अनेक ठिकाणी आकर्षक रोषणाई करण्यात आली आहे. ठिकठिकाणी बाजारपेठाही विविध रंगानी सजलेल्या आहेत. विविध आकारातील रौप्य आणि सुवर्ण रंगातील विविध डिझाईन्सच्या वेगवेगळ्या आकारातील सांता, सांताचे मुखवटे, लहान मुलांसाठी सांताचे ड्रेस, सांताची टोपी, ख्रिसमस ट्री, येशू जन्माचा प्रसंग दाखविणारी तयार दृश्ये, येशू जन्माच्या देखाव्यासाठी मूर्ती, लाकडी व थर्माकॉलच्या गोठा, विविध प्रकारचे मुकूट, स्टिकर्स,सजावटीच्या वस्तू, विद्युत माळा, चांदण्यांच्या आकारातील कंदील, विविध आकारातील मेणबत्त्या असे अनेक प्रकारचे साहित्य बाजारात विक्रीसाठी ठेवण्यात आले आहे. ग्राहकांची बाजारपेठेत गर्दीही वाढत आहे. लॅमिंग्टन, चॉकलेट आणि कॉफ़ीकेक, रम केक, ख्रिसमससाठीचा खास फ्रुट केक, बाटिका, बासबुसा,

ब्राऊनी, बिबिन्का, दोदोल, दोस अशी मिठाई देखील बाजारात विक्रीसाठी ठेवण्यात आल्या आहेत.वास्कोत ख्रिसमसचे (Christmas) एक वेगळेच वातावरण (Atmosphere) पाहायला मिळत आहे.