Candolim Murder Case: आपल्याच चार वर्षीय मुलाच्या खून प्रकरणात अटकेत असलेल्या सीईओ सूचना सेठला 13 दिवसांची न्यायालयीन कोठडी सुनावण्यात आली आहे.

गेल्या वेळी तिच्या पोलीस कोठडीत 5 दिवसांची वाढ करण्यात आली होती, त्याचा कालावधी आज संपल्यानंतर पणजीतील बाल न्यायालयाने सूचनाची न्यायालयीन कोठडीत रवानगी केली आहे.

सूचना सेठला आठ जानेवारी रोजी अटक केल्यानंतर सुरुवातीला सहा दिवसांची पोलीस कोठडी सुनावण्यात आली होती. त्यानंतर या कोठडीत पाच दिवसांची वाढ करण्यात आली.

सूचनाच्या वाढीव पोलीस कोठडीचा कालावधी समाप्त झाल्यानंतर आज (दि.19) तिला पणजीतील बाल न्यायालयासमोर उभे केले असता 13 दिवसांची न्यायालयीन कोठडी सुनावण्यात आली आहे.

चार वर्षीय मुलाच्या खून प्रकरणात नवनवीन खुलासे समोर येत असून, सूचनाने हॉटेलमध्ये चेक इन केल्यानंतर दोन तासांतच मुलाचा खून केल्याची माहिती समोर आली आहे. त्यानंतर तब्बल 19 तास सूचना मुलाच्या मृतदेहासोबत खोलीत थांबली होती असे सूत्रांनी दिलेल्या माहितीतून समोर आली आहे.

सूचना सेठवर आपल्याच चार वर्षीय मुलाचा खून केल्याचा आरोप आहे. गोव्यातील सिकेरी येथे मुलाचा खून करुन त्याचा मृतदेह बॅगेत भरून टॅक्सीतून पोबारा करण्याचा तिचा बेत होता. मात्र, कर्नाटकातील चित्रदुर्ग येथे तिला अटक करण्यात आली.

06 ते 08 जानेवारी या काळात हा सर्व प्रकार घडला. दरम्यान, या घटनेपूर्वी देखील सूचना गोव्यात आल्याचे तपासातून निष्पन्न झाले आहे.

पतीसोबत असलेल्या तणापूर्ण संबंध, घटस्फोटाची प्रक्रिया आणि मुलाचा ताबा या वादातून मुलाचा खून केल्याची शक्यता पोलिसांनी वर्तवली आहे.