Goa Assembly Elections 2022: गोवा विधानसभा निवडणुकीचे वारे आता सर्वत्र वाहू लागले आहे. गोव्यातील राजकीय वर्तुळात दिवसेंदिवस अनेक बदल आणि घडामोडी होताना दिसत आहेत. आपलाच मुख्यमंत्री होणार असा प्रत्येक पक्षाला विश्वास आहे. गोव्याची विधानसभा निवडणूक (Goa Assembly Elections 2022) जिंकण्यासाठी सर्वच पक्षांनी कंबर कसली आहे. आमचेच सरकार येणार असा दाव करत प्रत्येक पक्षाचे कार्यकर्ते जोमाने प्रचाराला लागले आहेत. गोव्याचे मुख्यमंत्री डॉ. प्रमोद सावंत यांनीदेखील (CM Pramod Sawant) आता प्रचाराचा नारळ फोडला आहे.

नव्या वर्षाच्या पार्श्वभूमीवर मुख्यमंत्र्यानी कोल्हापूरच्या अंबाबाईचे दर्शन घेतले. पत्रकारांशी संवाद साधताना ते म्हणाले, 'मी दरवर्षीच अंबाबाईचे दर्शन घेण्यासाठी कोल्हापूरला येत असतो, पण मागच्या दोन वर्षात कोरोनामुळे ते शक्य झाले नाही. गोव्याच्या समृद्धीसाठी, विकासासाठी मी देवीकडे प्रार्थना करतो.'

मुख्यमंत्र्यांनी कोल्हापुरात सहकुटुंब अंबाबाईचे दर्शन घेतले. गोव्याची निवडणूक जिंकण्यासाठी ते मैदानात उतरले आहेत. त्यापूर्वी त्यांनी प्रचाराचा शुभारंभ देवीचे दर्शन घेऊन केला आहे. तसेच त्यांनी जनतेला नवीन वर्ष सुखाचे, समृद्धीचे व आरोग्यदायी जावो असे म्हणत सर्वांच्या आरोग्यासाठी प्रार्थना केली आहे.