वास्को: वास्को येथे सोमवारी दिनांक 28 रोजी होणाऱ्या कार्निवल परेडनिमित्त वास्को शहरातील वाहतूक तसेच पार्किंग व्यवस्थेत बदल करण्यात आले असल्याचे वाहतूक पोलिस उपअधीक्षक सुदेश नार्वेकर यांनी पत्रकाद्वारे माहिती देताना सांगितले.

वास्को कार्निवाल समितीतर्फे वास्कोत आज रविवार पासून कार्निव्हलची धूम सुरू झाली असून मुरगाव नगरपालिके समोर उभारलेल्या रंगमंचावर कार्निवल निमित्त आयोजित कार्यक्रमाचे उद्घाटन मुरगाव पालिका (Mormugao) मुख्याधिकारी जयंत तारी यांच्या हस्ते करण्यात आले. दरम्यान सोमवार दिनांक 28 फेब्रुवारी रोजी दुपारी तीन वाजता दक्षिण गोवा जिल्हाधिकारी रुचिका कटीयाल यांच्या उपस्थितीत कार्निवल फ्लोट परेडला सुरूवात होणार आहे. त्यानिमित्त वास्को शहरातील वाहतूक व्यवस्थेत बदल करण्यात आला आहे.

फ्लोट परेड सेंट ॲंड्रूज चर्च जवळील लिना हॉटेल जंक्शन कडून मार्गस्थ होणार असून त्यानंतर स्वतंत्रपथ मार्गावरून दामोदर मंदिर, वास्को रेल्वे स्थानक ते आयओसी जंक्शन जवळ सांगता होईल. या दरम्यान सोमवारी दुपारी 12.45 ते रात्री 11 वाजेपर्यंत ट्रक, टँकर, ट्रेलर वाहनांची वाहतूक आय ओसी जंक्शन जवळ थांबवली जाईल.फ्लोट परेड पाहण्यासाठी येणाऱ्या वाहन चालकांना तानिया हॉटेल समोरील मोकळ्या जागेत पार्किंगची व्यवस्था करण्यात आली आहे. या दरम्यान स्वतंत्रपथ मार्ग कार्निवल होईपर्यंत दुपारी 1 वाजल्यापासून बंद ठेवण्यात येईल. स्वतंत्रपथ आणि एफ एल गोम्स अंतर्गत मार्गावर चारचाकी आणि दुचाकी पार्किंग व्यवस्था केली जाईल. स्वतंत्रपथ रस्त्यावरून जाणारी वाहनांची वाहतूक या दरम्यान एफ एल गोम्स मार्गावरून मार्गक्रमण करेल. तसेच वास्को शहरात प्रवेश करणारी अवजड वाहने शांतीनगर मार्गे वरुणापुरी कडे वळवली जाईल.

यादरम्यान ठक्कर हाऊस चर्च जंक्शन ते लीना हॉटेलपर्यंत रस्त्यांच्या दोन्ही बाजूला वाहनांच्या पार्किंग नसेल. तसेच स्वतंत्रपथ फ्लोट परेड मार्गावर सोमवारी सकाळी 8 वाजल्यापासून पार्किंग करण्यास बंदी घातली आहे. त्यानुसार वाहन चालकांनी त्या मार्गावर पार्किंग न करण्याचे आवाहन वाहतूक पोलिस उपअधीक्षक सुदेश नार्वेकर यांनी केले आहे. सर्व वाहनधारकांनी व सर्वसामान्य जनतेने सहकार्य करून पर्यायी मार्गाने जाण्याचे आवाहन यावेळी नार्वेकर यांनी केले आहे.