Shripad Naik पर्यटन राज्य मंत्री रोहन खंवटे यांच्या वाढदिवसाचे औचित्य साधून शनिवारी (काल) प्रसिद्ध दोना पावला जेटी पर्यटकांसाठी खुली झाली. या जेटीच्या उद्‍घाटनाला केंद्रीय पर्यटन राज्यमंत्री म्हणून आणि खासदार म्हणूनसुद्धा पर्यटन खात्याकडून निमंत्रण मिळाले नसल्याबद्दल श्रीपाद नाईक यांनी आपली भडास बाहेर काढली. याप्रकरणी मुख्यमंत्री प्रमोद सावंत यांनी लक्ष घालण्याची गरज असल्याचेही त्यांनी म्हटले आहे.

झुआरी पुलावर व्यासपीठावर बोलविण्याचा नाट्य घडल्यानंतर आता दोना पावला जेटीच्या उद्‍घाटनासाठी निमंत्रण डावलण्याचा प्रकार घडला असल्याने खरोखरच नाईक यांच्याकडे कानाडोळा करण्याचा प्रकार सुरू आहे काय? अशी चर्चा त्यांच्या कार्यकर्त्यांत सुरू झाली आहे.

उत्तर गोव्यात 2024 मध्ये भाजप नव्या उमेदवाराचा शोध घेत असल्याचे स्पष्ट झाले आहे. त्यामुळे श्रीपाद नाईक यांचे नाव मागे पडत असल्याचे दिसत असले तरी त्यांनी पुन्हा एकदा निवडणूक रिंगणात उतरण्याची इच्छा व्यक्त केली होती.