Cashew News: रिवण येथील एका गोदामाला शुक्रवारी (ता.२) दुपारी आग लागून आतील काजू बिया व सुपारी जळून खाक झाल्याने नागेश प्रभुदेसाई यांचे लाखो रुपयांचे नुकसान झाले आहे. कुडचडे अग्निशामक दलाने ही आग आटोक्यात आणली.

प्राप्त माहितीनुसार, शुक्रवारी दुपारी रिवण येथे शेतातील सुक्या गवताला भर दुपारी अज्ञाताने आग लावल्याने आग सर्वत्र पसरली.

या शेतात नागेश प्रभुदेसाई यांचे दुकान असून त्यांनी दुकानाच्या वरच्या मजल्यावर पेपर रद्दी, सुपाऱ्या तसेच काजूबियांची साठवणूक केली होती. या आगीची झळ दुकानाला बसल्याने आतील साहित्याने पेट घेतला.

या आगीची माहिती कुडचडे अग्निशामक दलाला दिली असता अग्निशामक दलाने त्वरित घटनास्थळी धाव घेऊन आग आटोक्यात आणली.

या आगीत काजू बिया तसेच सुपाऱ्या जळून गेल्या असल्याचे कुडचडे अग्निशामक दलाचे निरीक्षक दामोदर जांबावलीकर यांनी सांगितले. या आगीत दहा लाख रुपयांचे नुकसान झाल्याचे दुकानमालक प्रभुदेसाई यांनी सांगितले.