Lok Sabha Election: निवडणूक मतपत्रिकेवर घ्या!

Lok Sabha Election: भारतातील लोकांना इव्हीएम मतदान यंत्राद्वारे फसवण्याचा प्रकार चालला असून येत्या लोकसभा निवडणुकीत मतदान पत्रिकेचा वापर व्हायला हवा, अशी आग्रही मागणी इव्हीएमविरोधी नागरिकांनी फोंड्यात आज शुक्रवारी घेतलेल्या पत्रकार परिषदेत केली.

सर्वोच्च न्यायालयाचे ज्येष्ठ वकील भानुप्रताप सिंग तसेच डी. सी. कपिल यांच्यासह अतुल पटेल, मारियानो फेर्रांव, तनोज अडवालकर, रामकृष्ण जल्मी व सर्फराज आदी उपस्थित होते. या पत्रकार परिषदेत इव्हीएम या इलेक्ट्रॉनिक मतदान यंत्राद्वारे मतदारांची कशी फसवणूक होते, त्याबद्दल सविस्तर माहिती देण्यात आली.

इव्हीएम मशीन तयार करणाऱ्या कंपनीची माहिती आरटीआयमार्फत मागवण्यात आल्यानंतर हा घोटाळा उघड झाल्याचे भानूप्रताप सिंग यांनी सांगितले.

इव्हीएम नकोच, मतपत्रिकेचा वापर व्हावा असा आग्रह धरणाऱ्या भारतातील जागृत आणि सजग नागरिकांनी ९६६७७२२०६२ या क्रमांकावर मिस्ड कॉल द्यावा, असे आवाहन त्यांनी केले.

बैठकांचे आयोजन

येत्या २५ फेब्रुवारीला दिल्लीत पंतप्रधान नरेंद्र मोदी यांना घेराव घालण्यात येणार असून यावेळी बहुसंख्येने लोकशाही मानणाऱ्या मतदारांनी उपस्थित रहावे, असे आवाहन करण्यात आले. या इव्हीइमच्या घोटाळ्याची माहिती देण्यासाठी दक्षिण आणि उत्तर गोव्यात बैठका आयोजित करण्यात आल्या असल्याची माहितीही यावेळी देण्यात आली.