Goa Land Scam CM Pramod Sawant Orders Strict Action

पणजी: पर्वरी-हाऊसिंग बोर्ड येथे भूखंड देण्याचे आमिष दाखवून मडगाव येथील मुनीरूद्दीन खान व त्यांची अंध मुलगी सुमेरा खान यांना ८ लाख रूपयांना फसविल्याची तक्रार मडगाव टाऊन पोलिस स्थानकात करण्यात आली आहे.

या संदर्भात तक्रारदार मुनीरूद्दीन खान व सुमेरा खान यांनी मुख्यमंत्री डॉ. प्रमोद सावंत यांची साखळीत भेट घेतली. हे प्रकरण माणुसकीला काळीमा फासणारे आहे,असे सांगून या प्रकरणाची चौकशी पोलिसांमार्फत करण्याचे निर्देश मुख्यमंत्र्यांनी दिले.

दरम्यान, हा फसवणुकीचा प्रकार गेल्या २०२० साली घडला होता. मडगाव (Margaon) येथील एक एसी मेकॅनिक सिराजुद्दीन खान हा आपल्याकडे आला व त्याने संशयित सादिक शेख हा पर्वरी येथे हाऊसिंगबोर्डचा भूखंड विकत देऊ शकतो. शक्य असल्यास आपण घेऊ शकता, असे सांगून मागे लागल्यामुळे आपण सदर भूखंड पाहण्यास तयार झालो,असे मुनीरुद्दीन याने सांगितले.

कारवाई होणार, मुख्यमंत्री

सरकारी नोकरी घोटाळापाठोपाठ आता भूखंड विक्री घोटाळाही समोर आला आहे. संशयित सादिक याला पणजी पोलिसांनी नसरिन बानू या तरुणीलाही भूखंड व नोकरी (Job) देण्यासाठी तिच्याकडून ५.५० लाख रुपये घेतल्याची तक्रार नोंद करून अटक केली आहे. त्याने सुमेरा खान हिलाही फसविल्याने त्याच्यावर कारवाई केली जाईल, असे मुख्यमंत्री म्हणाले.

लोकांनी सावध व्हावे!

सदर सादिक शेख या युवकाने पैशांच्या आशेपोटी एका अंध मुलीची फसवणूक करून त्यांना लुबाडणे हा अत्यंत खेदजनक प्रकार आहे. मानवतेला काळीमा फासणारा हा प्रकार असून लोकांनीच अशा प्रकारणांतून आज शिकायला हवे. गोव्यात आज अनेक प्रकारे लोकांची फसवणूक करण्यासाठी अनेकजण सरसावले आहेत. त्यांना पैसे देण्यापासून स्वतः सावध होणे आवश्यक आहे, असे मुख्यमंत्री डॉ. प्रमोद सावंत म्हणाले.